Ating anac anang sinabi, "I'm a cabalen myself...pero 'di ako marunong magkapampangan...my father is a kapampangan and he can speak kapampangan fluently..." O, ngeni!? Capampangan y'ia uari canita?
Atin pa mu ring dacal a papasiag da yng y'la campampangan la agiang pang e no man biasang magamanung campampangan. Uli mo sang campampangan la ring pengari da, buri da mong masasabing campampangan la naman.
Iniang minunang panaun, ala ne mang problema y'ta uling ala ne mang maroc a abibie qng campampangan. Oneng ngeni, menibaiu ne yng panaun ampong dacal na yng malialiaring e masanting qng campampangan.
Agiang pang campampangan la reng pengari mu ampong agiang pang mibait ca qng Imperia Ning Campampangan, nung e na ca man biasang magamanung sisuan, e na ca campampangan. Uli na ni'ta, e mu na papasiag yng y'ca campampangan ca.
Quing aliuang banda, campampangan y'ia pa mu rin yng anac a mibait ampong medagul qng aliuang lugal, campampangan la reng pengari na, ampong biasa y'iang magcampampangan.
Anti mu naman, campampangan y'ia naman yng anac a mibait o meragul qng Imperia Ning Campampangan, biasang magcampampangan, at lulugud ampong pagmaragul ne yng amanung sisuan; agiang pang ala caring pengari na yng campampangan.
Macanita pa man, maracal pa mu rin yng maliaring sangcan nung campampangan ca pa o ali na. Maragul yang bage yng lugud mu qng Amanung Sisuan.
Yng Sala