Calupa na nitang sinabi cu que tang minunang tinap, tagal yang congresswoman y Pamuntuc Gloria Macapagal Arroyu qng caduang district ning Pampanga (Lubao, Guagua, Sasmuan, Floridablanca, Sta. Rita, ampong Porac). Calupa na mu naman nitang sinabi cu canita, ala yang casambut queng daratang a alalan a y ni. O nung ping ing anac nang y Representative Juan Miguel "Mikey" Arroyo a e man meragul qng Lubao icua nang macataduang sinambut carin bilang congressman, ing inda na pa caya?!
Mangga man pin ngeni, alang maqui masican a lub ban tagal bilang congressman ning caduang district ning Pampanga ban lumaban cang Gloria uling balu da namang ala lang panama. Balu dang mipacarine la mu nung tagal la pa. Maracal quen a bisang papil qng daratang a alalan ban mong mabantug la inya mo maquisaque la mo queng pisasabian a anti y ni. Papalto da mong masican la lub ban salang cang Gloria qng caduang district ning Pampanga oneng milupalupa la mung curulan.
Lacuas lang maracal reng bubula asbuc qng pamanagal nang congresswoman y Gloria dapot angga la mu qng pamagcaingie. Pulus la mung mangariria a ala namang bitasang arapat qng sarili da ampon qng balen da. Metung ne caren ing sociology professor a Randy David a minunang pepasiag a tagal qng caduang district ning Pampanga at minurung bandang tauli uling aintindian na mu namang ala yang capaniambut aguiang dimut mu. Dapot sayang ya mu naman ing cabalen ta mung y ni at melili ya ing pangacapampangan na. Icua da neng alaso utac ring Tagalug a susuyuan na.
Quing caracal na asaup Gloria qng mabilug a Labuad Capampangan at talagang pacalam mi ya. Agguiang nu carin ya pa qng Labuad Capampangan tagal y Gloria, metung ya mu ing manaya caya, ing lumput ya. Y cami na rugung Cabalen na ing bisang tagal ya, nung uari, seselan nea mu.
Pauli da reng mengapalyari, tinaglus ya y Pamuntuc Gloria Macapagal Arroyu qng Commission On Elections (COMELEC) ning City of San Fernando quing Pampanga inyang Martis (Mumunang aldo ning Disiembri) caibat nang sinimba qng St. Augustine Church ning Lubao ban ipalad ne ing cayang Certificate Of Candidacy (COC) ban tagal qng caduang congressional district ning Pampanga.
Ala namang maroc nung tagal ya y Gloria bilang congesswoman lalu na nung e na man babaual ning batas. Ua, mapalyaring asabi ta mung Pamuntuc ya caibat tagal yang mababang catungculan a lupang manong dapot bitasang alang maroc. Magbayu ing queganagana at metung mu y ni careng dacal a pamagbayu.
Macusuelu ta mu pin dapat uling y tamu mu ing mecarapat queng antining capalyarian. Magcusuelu la pin dapat reng qng caduang district ning Pampanga, uling amanan mung sadia yang Pamuntuc ning Filipinas ing congresswoman mo?! Ai ba! Seselan na ca mu pin, atin na cang congresswoman, atin ca pang Pamuntuc. Nanu pang e mu buri?!
At calupa na pa mu rin nitang minuna cung tinap, maguin yang Pun Minister ning Filipinas at mipaltutu na ngan ing cacung simbitla. At uling ali ne bisang tagal pangapamuntuc y Among Ed, capalyari na namang manalili caya y National Defense (DND) Secretary Gilberto “Gibo” Cojuangco Teodoro, Jr. bilang tutuquing Pamuntuc ning Filipinas. Nung ninu naman ing magsilbing Governor ning Pampanga, uyni ing panayan tamo.
Careng e Capampangan, e yu cami asaul isip, diua, ampong catalacaran. Ninu uaring malyari buri? Y came o y cayu? Nung masaquit cayu lub, mayap pang mabating na cayu mu at panintunan ye ing caladuang yung lito-lito a malilili qng cayalan.
"Cailangan da ca pa queti Pampanga. Nung dadacuracan da ca reng aliuang tauo pauli da ring isipan da queca, italacad da ca y caming Capampangan. Nung dadacuracan da ca reng aliuang tauo uling Pamuntuc ca at ngeni tatagal na mung Congresswoman, y cami, ring Campampangan, italacad da ca." -- Among Bogs Moraleja ning pisamban St. Augustine qng Lubao
Yng Sala