Luñgub ca qng supermarket at maglacad-lacad qng quilub na niti angga qng atin cang asumpuñgan a macabalag a tinda qng samientu. Magmasid ca careng tauo a mañiali qng quilub na ning supermarket at lauen mu nung nanung apansin mu patie lebasan de y tang macabalag a tinda. Anti la mong alang iquit at cabud da nea mu labasan y tang tinda. E de man rugu pulutan at icanang pasibayu quetang pibatan na. Yng maroc na pa niti, agguiang y lang mecanabu quetang tinda, anti la mu namang alang iquit a menabu at bala-balaus la mung qng pamaglacad da. Pati y ca, e da ca man aquit a iquit mo palang atin lang anabu careng tinda qng quilub ning supermarket.
Anti mu rin, luñgub ca careng bale pipagobran a mañgaragul. Nanung palague mung malyari nung ating pacacalat a tissue, papil, o nanu ya man y ta qng dadalanan? Ua mu naman! Macalunus uling macanian la mu naman ugali pati rugu qng sariling dang pipagobran. Anti la mu namang alang acaquit reng magobra carin uling icua da nang macatapilang linabas qng dadalanan at e la man magcusang pulutan reng pacayugseng sucal qng dadalanan da. Mapalyaring uling atin lang maglinis qng pipagobran da at iyasa da nea mu carela reng pacacalat a sucal qng dadalanan da. Macananu caya nung ala lang maglinis carin, paburen da na mung mitambac qng dadalanan da reng sucal!?
Nanu naman caya ing linub careng utac da reng tauo at ala lang masabal qng calinisan qng carinan da. Macapagal uari nung pulutan me ing papil a macacalat qng samientu at iyugse qng piugsayan!? O mipanenaya na la mu reng tauo ban atin mamulut at maglinis!? O mipaquiramdaman la pa mu caya!? O pota galang marine lang masabing masipag, mapagmasabal, malinis!? O mapaliaring mipaquiapus na mu, uling e ne pinulut nitang minunang menaquit, e na ne mu naman pulutan y ta.
Atin pang ugaling mamañgan bubble gum at iyapsa da ne mu y ti ambusqui nu carin angga qng e mu man balung adamusac mu ne pala. Iñya uyta, ume ca quetang suluc at carin me pigadgad-gadgad ing sapatus mu. Ampo mu naman caretang sisindi, ipitic de ing cigarillu qng palele-lele na mu caibat dang sinindi at palual ing tauling asuc.
Yng Sala