Quing casulungsungan a panaun a yti qng labuad capampangan, dacal la reng anac a daragul a e la capampangan uling daragul lang Tagalug. Isipan mu na mu y'ta!? Mibait la quing Pampanga, capampangan la ring pengari da, ampong daragul la qng Pampanga, oneng o bat Tagulag ya yng anac.
Reng pengari da mismu yng mililili caring sarili dang anac niapin daragul lang mulala deng anac da qng sarili dang amanung sisuan. Talasaup la qng pangamate na ning indung amanu.
O bat mo tuturu da lang magtagalug reng anac da? Dapot capampangan y'ia yng cailangan dang ituru.
Ot paquisabian do qng amanung Tagalug reng anac da? E no man mibait a Tagalug reng anac da.
Ot lalon dong aliua reng anac da? Anac do no man.
E ta no man maliaring cabud parsalan deng anac. Nang male da uari?
Yng paquibat, uling meragul la mu namang mulala deng pengari da. Uling balada ystu y'ia yng daraptan da. Uyta, pepamana da mu naman caring anac da yng camulalan.
Ot mulala la reng pengari da? Uling yniang magaral la pa, tiru do ring mestra dang gamitan y'ia yng tagalug. Yng sabi da ring mestra da, kailangan yng tagalug yng abalu da.
Buri na mu namang sabian canita, mulala la mu naman ding mestra da. Ot macananu lang mulala mu naman ding mestra da? Uling atuburan da la ning gobiernu a tagalug yng yturu da. Reng macalunus a mestra, maquituqui la mu rugu, e da man ysipan nung ystu y'ia pin yng tutuquian da o ali.
Yng pang masaquit qng Pilipinas, ot ninu reng maclac a buntuc king clasi, y'la pa reng cucuang cursu qng pamagmestra. Ynia pin yta, dacal ta mung mulalang mestra ban canita aturu da la mu namang camulalan deng magaral.
Ating sinabi, capampangan y'ia canu salita qng bale, oneng patie paquisabian na no canu reng paunacan na, tagalug y'ia yng gagamitan. Uli canung reng caquialung da, tagalug la salita, ynia pin tagalug da no mu namang peparagul. Ai! Canong na. Buri nang sabian, liguran de pa yng amanu da reng caquialung da quesa quetang amanung sisuan da reng pamilia na. Bolang co pin! Pangaragul da reng paunacan mu, deng caquilung da yng luguaran da anti mong pamilia da.
Ampo rugu yng ugaling tagalug, penaclaid da mu naman. Niaman dang sagapan deng mamarus.
Yng Sala