Sunday, January 4, 2015

CARIN CU PA MU RIN


Atna cung caburing mamañgan amburjer iñyang malati cu pa, lalu na iñyang megaral na cu qñg college, at mangga man ñgeni. Yng McDonald's ing pecamumuna cung abalung humburger restaurant canita at ala pang Jollibee canita. Agpang queng balu cu, ing McDonald's Dau mu ing atin canita pauli da reng Amercanu qñg Clark Air Base at y ti mu rin ing pecamumunang McDonald's a liban cu iñyang tiqui da cu reng dara cu carin. Uling ati lu pa reng Amercanu qñg Clark Air Base canita, maracal la reng Amercanung cayagnan ming mamañgan. Palague cu, ing McDonald's Dau mu rin ing pecamumunang McDonald's qñg mabilug a Filipinas. Queng queluatan, atin na mu ring McDonald's qñg intersection ning Gapan-Olongapo Road ampong McArthur Highway qñg balen ning Sam Pernandu. Pilan mung banua caibat na nita, anti na lang cuat a memañiulput reng miayaliuang hamburger restaurants bucud qñg McDonald's anti da mo reng Jollibee, Wendy's, ampong aliua pa.


Nung y'acung papamilinan nung sanu ing palac cung buri careng adua, McDonald's o Jollibee, ing McDonald's pa mu rin ing buri cu uling palac mañyaman ing canan da carin lalu na iñyang panaun a American standard pa ing pisasali da carin. Dapot ñgeni, Filipinu standard na mu rugu ing yayapag dang canan qñg McDonald's. Melati na la reng amburjer ampong menaliua na la lasa. Balu ta naman patie Filipinu standard mu, alang ca-cuenta-cuenta.


Yñyang college cu pa, migfield trip cami canita qñg Menila ampong memasyal qñg SM City North Edsa at carin cu minunang mecatacman careng amburjer ning Wendy's restaurant. Yñyang linub cu quilub ning Wendy's restaurant, micasuelu cu qñg banglu na ning ababau cu at queñyamanan cu queng amburjer da anti mu rin. Carin que mu rin minunang abalu ing SM City mall a palague cu y yang pecamumunang mall quing Filipinas.


Yñya namang magobra cu, mecapañgan na cu mang pizza burger ning Didi's Pizza, maragul ya at mañyaman yang talaga, lalasa yang pizzang mañyaman.


Caibat ning macabang panaun, maracal nang banua ing milabas, buri cu lang balicang tacman reng mañgañyaman a amburjer ning Wendy's ampong Didi's Pizza.


Capilan pa mu, mica Wendy's restaurant qñg SM City Clark at y ni na ing pamicatagun a mallari cung balican tacman ing mañyaman a amburjer a atacman cu canitang college cu pa. Misan a aldo, mine cu qñg SM City Clark at linub cu qñg Wendy's restaurant. Binasa que ing menu a macasabit queng babo ning counter da at paintunan co reng amburjer da. Icua cung mepagal qñg cacabasa qñg menu ra at ala cung iquit a amburjer carin iñya sinabi cu quetang service crew da a e que aintindian ing menu ra. O se map na mu at biasa ya at maganaca ing service crew a acasabi cu, atneng catalustus magCapampañgan at inisplica na ñgan canacu nung nanu ing aquit cu qñg Wendy's restaurant. Sinabi cu caya a bisa cung mañgang amburjer at sinabi na canacu a y ta canung Baconator ing amburjer da. Mipagsalita cami at acutang na canacu nung balu que canu ing Wendy's, "Wa" sabi cu caya at sinabi cu mu rin a iñyang college cu pa iñyang tauli cung meñgan qñg Wendy's restaurant. Asabi na pa canacu a ing Wendy's SM City Clark mu canu ing atin qñg Pampanga. O se minorder na cung Baconator at atneng caragul, inabayan que mu namang prensprais a mañgaragul naman pañgaguili, ampo pang orange juice. Qñg malaguang salita, ala ne y tang amburjer a atacman cu iñyang college cu pa at e na ne cayanti lasa ning Baconator da. Wa, maragul ya ing Baconator at quinabsi cung masalese oneng e na ne casing ñyaman nitang amburjer a atacman cu canita qñg Wendy's iñyang college cu pa. Anti mu rin, ala ne pala y tang Salad Bar da dapot abalitan cung ibalic ne canu ning Wendy's ing Salad Bar na. Asubucan cu ne ing Salad Bar da canita mu namang college cu oneng e cu micasuelu. E que capad ing macaroni salad.


Caibat na ning miguit-cumulang a pabulan caibat queng abalican ing Wendy's, ing pizza burger naman ning Didi's Pizza ing canacung ticman pasibayu. Minta cu qñg Didi's Pizza restaurant qñg McArthur Highway, Balibago, Añgeles City at e cu asajan a maralumdum ya pala queng quilub na niti ampong fine dining ya datang. Bala cu sa casi calupa ne mu rin datang ning McDonald's ampong Jollibee. Bala mu bale ya mu ing Didi's Pizza a selesen da na mu ba yang maguing restaurant, atin yang aduang aquarium, ati yu ing metung a maqui maragul a asan qñg uanan mu caibat mung linub qñg pasbul at ati ne man ing metung quetang gulut malapit qñg cashier. Atin ya mu namang babo bale at malapit ya ing eran na niti quetang mumunang aquarium. Megaua la qñg dutung ampong bacal reng la mesa na ampong luclucan. Alus maracal na la mu naman reng mamañgan iñyang linub cu carin. Linapit ya canacu ing waitress at quitnan na cu nung magtake out cu cano o nung carin cu canu mañgan, sinabi cung carin cu mañgan at pepaluclucan na cu at diñuang ne ing menu ra. Adua la mu reng disnan cung waitress carin at Capampañgan ya ing acasabi cu at ali ne man ing cayabe na, bala mu Bisaya ya mu ing cayabe na. E que man binasa ing menu ra uling balu cu nang agad nung nanu ing buri cung saluan carin. Quitnan queng agad ing waitress nung atin la pa mu ring pizza burger at tinañgu ya y ti, añya inorder queng agad ing pizza burger, prensprais, ampong pineapple juice. Minuna na lang linual ning waitress reng catsup, hot sauce, metung a basung danum, ampo pang basung ating yelu ampo pa ing pineapple juice a macalata. Pañgabagguia, dintang ne mu rin ing canacung pacapanenayang pizza burger ampo pa ing prensprais. Atneng caragul ing pizza burger at uling maragul ya y ti, tambing yang macaguili qñg libutad. Yñyang quininis na cu queng pizza burger, e na ne casing ñyaman nitang atacman cung minuna canita, reng prensprais naman, anti da la mu caretang asasali queng Jumbo Jenra supermarket.


E na cu micasuelu anti na ning dati careng hamburgers na ning Wendy's ampong Didi's Pizza at manatili cu pa mu ring balic-balican ing canan qñg McDonald's agguiang e na na casing ñyaman ing canan da carin anti iñyang panaun da pa reng Amercanu qñg Clark Air Base. Dapot micasuelu cung bina quetang service crew ning Wendy's restaurant qñg SM City Clark ampo nitang waitress ning Didi's Pizza uling magCapampañgan la, miglacuan cu pa ping galal o tip qñg Didi's Pizza uli na mu nita.


Yng Sala