E cu balu nung macananu ing cabilian na canita ning Filipinas iñyang panaun a commonwealth ne pa ning America. Mapalyaring ala pang menucluan o squatters canita uling mayan pa ing bie. At mapalyaring e na ne man gauang commonwealth ning America ing Filipinas nung catmu yang menucluan y ti, ale!? E cu balu nung dapat cung maguing matula o ali uling belag ne ning America ing Filipinas anting commonwealth na uling caretang panaun a reta, pinili de ing mabuluc a sabing Tagalug anting national language. Nung sanang menatili nea mung Spanish ing national language canita, biasa ta sa nang sumabing Español ñgeni.
Nung y'acu mu ing cucutnan, burian cu nang menatili nea mung commonwealth ning America ing Filipinas uling quinalat ya pa mu rin ing Tagalug agguiang e ne commonwealth ning America ing Filipinas ñgeni. Uling nung menatili ya pa mu ring commonwealth ing Filipinas, maguing mayan ing bie, at maracal-a-dacal, ing sabing English ing maguing national language na ning Filipinas qñg queluatan. Sayang naman!
Atin yang bantug a quesabian y Manuel L. Quezon a sasabing, "I would rather have a country run like hell by Filipinos than a country run like heaven by the Americans, because however bad a Filipino government might be, we can always change it." Yñya pin e ta na magtaca nung talagang "hell" ing bie qñg Filipinas. Baquit sucat meng isugal ing bie na ning Filipinas careng anac putang Filipinung mañgatamad. Bala mu naman uari pecasabian na la ñgang Manual L. Quezon reng anggang tauo queng Filipinas at abalu nang y ta pin ing caburian da, ing bieng "hell" a pagnasan na. Nung apansinan yu, sigluñgan neng "...because however bad a Filipino government might be, we can always change it." uling balu nang maracal-a-dacal a mipacaroc yang talaga ing Filipinas nung Filipinu ya ing talan caniti. Caibat na ning macabang panaun, tutu ping maroc yang manibala ing Filipinu, at agguiang macananu pang cacabang panaun ing milabas, alang migbayu. Nung atin mang pamagbayu, y ya pin ing lalu mung pacaroc a cabilian na ning Filipinas. Yñya ñgeni, cabilang ya ing Filipinas careng amanuan dang "Third World Countries". Pablasang alang "Fourth World Countries", nung ali sana carin macabilang ing Filipinas.
Agguiang nu ca dumurut ñgeni queng Filipinas, aquit mu ing casaquitan. Dacal la reng menucluan, sula-sulapo la reng basura queng dalan, dacal a daranup. Pulus ñgan third world ing aquit mu. Salamat naman at atin pa palang Clark ampong Subic a menatiling "First World" uling carin la migdatun reng Air Force ampong Navy na ning America anggang meco na la iñyang panaun nang pamuntuc Cory Aquinu. Yñya pin patie ati ca quilub na ning Clark, bala mu ala ca man quing Filipinas uling calupa ne pa mu rin iñyang licuan de reng Amercanu. O se map na mu mesaguip la reng Clark ampong Subic careng Filipinu nung ali sana, quinatmu na la mu namang menucluan. At patie linul ca qng Clark, dumalan ca man qñg Main Gate o Mabalacat Gate, anti ca mong linacbang qñg aliuang bangsa a third world. Magmula mu na lang aquit reng menucluan, sula-sulapong basura, reng tauong danupan, reng mañgachurang bisaya qñg Fields Avenue, at nanu-nanu pang mañgaplas careng mata.
E ne military base ing Clark ñgeni agguiang ati la reng Philippine Air Force qñg malating dane na niti nune meguin neng Special Economic Zone nung nu carin la reng piyausan saup (call centers), pipañgauan (factories), casinos, resorts, ampong miayaliua pa. Patie holiday na qñg Korea, asajan mu nang mamañiatang na la reng tauo Korea qñg Clark bang mamialung golf. Agad lang macaratang reng tauo Korea qñg Clark e mu uling malapit ya ing Korea qng Clark nune uling ating budget airlines a susulapo manibat qñg Korea at tataglus agad at duragpa qng Diosdado Macapagal International Airport (DMIA). Nung uari, gueua reng pasyalan reng tauo Korea ing Clark bang magpainaua o magsaya. Atin na la ping sarili dang pipañganan, resorts, ampong hotels reng tauo Korea a pacatalacad na qñg Clark a macasadia na andat datang la.
Ara pen, meguin yang pipamyaluñgan o playground da ring mañgasalapi ing Clark. Queti la mitabnu-tabnu reng miquila-quilalang mañgasalapi ban canita mamyalung golf, o sugal careng casinu caya, o mañgan careng mañgamal a pipañganan carin. Mayap na pin ing anti caniti ban canita manatili yang first world ing Clark uling reng Clark ampong Subic na mu reng mitatagang daque na ning Filipinas a first world, calual mu careti, y ya pin na ing tutung Filipinas a third world.
Yng Sala