Atin yang sariling pamaniulat ing capampangan iniang minunang panaun baiu la dintang queti ring Castila a yapin ing ausan dang Culitan.
Yniang 1571 nung capilan la dintang ring Castila queti, tiru da quecatamu ing pamaniulat Roman o ing ausan dang Romanized spelling. Pequituqui dia mu naman nung macananu de gagamitan ing pamaniulat Roman quecatamu.
Manibat canita, susulat la reng capampangan qng pamaniulat a Roman qng mabilug a atlung dalan a banua.
Yng susulat cung ini, macatuqui ya qng pamaniulat a tiru da quecatamu ring Castila. Ausan dia mu naman ing pamaniulat a ini qng laguiung pamaniulat Baculud, C-Q, at miayaliua pa.
Quing pananun a bandang 1900, elilan de ri Aurelio Tolentino ampong Zoilo Hilario ing carelang pamaniulat Capampangan. Gagamitan de pa mu rin ing pamaniulat Roman oneng leco do reng C ampong Q nung nucarin libayan dong K namu, inia meiaus yang pamaniulat K. Depat da ini pauli na ning buri dang ilaco ing pangacastila. E da buring maiayaus a manamdam caring tauo menibat aliuang bangsa. Oneng aguiang pang macananu lang sumulat, manamdam la pa mu rin nung ing pamaniulat Roman pa mu rin ing gagamitan da uling ibat ya qng aliuang bangsa ing pamaniulat Roman.
Uli na ing depat da ri Aurelio Tolentino ampong Zoilo Hilario, micagulu la reng capampangan caras qng sanu ing tuquian qng pamaniulat Capampangan. Atin na mu namang guinawang pamaniulat compromise ba la mong mipanusigan deng mibubungil diquil qng sanu ing tuquian qng pamaniulat Capampangan.
Ing pamaniulat Baculud or C-Q ing cailangan tuquian uling:
1. Ini ing balamu pamana da reng Castila quecatamu pangaras qng pamangamit paniulat Roman.
2. Ini ing guinamit da ri Fr. Diego de Ochoa, Fr. Francisco Coronel, Fray Alvaro de Benavente, ampong Fr. Diego Bergano caring gueua dang Artes ampong Vocabulario Capampangan a maliari tamung tuquian.
3. Ini na ing queragulan tamung Capampangan qng malambat a panaun. Quilala do no reng Capampangan qng canining pamaniulat.
4. Ini ing guinamit da reng matenacan a calupa da ri Juan Crisostomo Soto, ampong reng aliua pa.
5. Ini ing bibie qng pangatauo tamung Capampangan (identity).
Yng Sala