Quecatamung Capampangan, atin careng anac da ing maqui palaguiung "Baby". Aguiang pang metua ne, "Baby" ya pa mu rin ing palaguiu ra. E cayu magtaca obat ating palaguan dang "Baby" caring anac o careng micacapatad a Capampangan? Qng Capampangan casi, ing "Baby" y ya ing bali "Junior" da ring babai. Ynya patie y ca ing bunsu careng babai, mipalaguan cang "Baby". Anya nung atin cang dara a palaguan mung Darang "Baby", buri nang sabian canita y ya ing bunsu dang capatad a babai na ning quecang pengari. At nung ing inda mu ing ausan dang "Baby", matulid mu ing y ya ing bunsu carelang micacapatad.
Ngening daratang a alalan ning May 2010, ating "Baby" a tatagal, y ya pin y Lilia "Baby" Pineda. Qng malaguang salita, y ya ing bunsu carelang micacapatad. Ninu uari pala y Lilia "Baby" Pineda? Tauo ya Sta. Cruz, Lubao a asaua nang Rodolfo "Bong" Pineda. Meguin ya mu namang mayul na ning Lubao at Board Member ning Pampanga. Tinagal yang governor ning Pampanga inyang milabasan a alalan ning 2007 at mesambut cang Amung Ed Panliliu.
Dacal ing sasabi ngeni a mapalyaring y ya na ing tutuquing governor ning Pampanga uling sagli nea mung sambutan y Governor Amung Ed Panliliu. Nung pangutnan mu la reng cabalen tamu nung ninu ing iyalal da ngeni, atnong pamagcasaquit maquibat uling e da mu naman balu nung ninu ing dapat dang iyalal. Dapot dacal carela ing sasabing masambut ne queni y Among Ed uli ning balumu aliua talaga dapat y ya ing governor pauli na ning pangasambut na quetang recount.
Nung sabague, nanu na uari ing apala tamung Capampangan cang Among Ed. Bala cu pa mo canita, cumampi ya cang Pamuntuc Gloria Macapacal-Arroyu inyang sinambut yang governor dapot quelabanan ne pa. Canini cu tinabang a lub cang Amung Ed. Calaban na la mu naman reng dacal a mayul ning Pampanga at dacal la mu naman reng quinauani caya a sadiang sinaup caya inyang mangampania ya pa. Ampo pa ing cutang, asaguip na neng Among Ed ing Amanung Sisuan? Dapot atin yang daraptan caniti ban masaguip ya pin ing Amanung Sisuan, oneng masasaguip ya uari? Ali ya, uling culang ing daraptan na ban ipaglualu ne ing Amanung Sisuan. Ing samal nang arapan, ya pin ing mala-showbiz nang bie manibat inyang meguing governor ya. Yng maroc na pa niti, papaigamit ya pa careng digpa ning alting Tagalug at acaquit yu namang baguia na mung capad Among Ed. Quesa yata saguipan ne ing Amanung Sisuan, buri ne pa atang paten ban ya mung mipanusigan ing bie nang showbiz.
Sabi cu canita, subucan ta ya ing Among Ed, at nung iquit tamung cailangan ya pang manatili qng pangagovernor na, obat ali taya ilucluc pasibayu. At nung e tamu micasuelu, atin tamung upaya ban ilaco taya at mamiling aliua. Milabas mu rin ing atlu nang banua at ngeni ta ne atulan. Nanu ing ibie tamu caya? Denan taya pang caduang apag o ali na?
Nung yacu mu ing cucutnan, e cu mu naman micasuelu cang Amung Ed at mapalyaring e cu ne iyalal. Sibucan ta ne, e ya milyari. Qng palague cu, panaun na naman ban sumubuc tamung aliua. Obat e taya mo subucan y Lilia "Baby" Pineda. Pota y ya mu ing panayan tamu ban masaguip ya ing Amanung Sisuan, ban masaguip ya ing Capampangan, at ban masaguip ya ing Pampanga. Ing panalangin cu mu cang Lilia "Baby" Pineda ing e ya sana paigamit calupa nang Amung Ed careng Tagalug uling ngeni pa mu, balamu liguid-liguiran da ne reng Tagalug uling e pa man macalucluc qng capitolyu, alilan da ne laguiu. Amanan mung ausan deng nanay reng mamulang a Tagalug! Reng Tagalug talagang a ren, ala lang balung dapat a mayap.
Yng Sala