Misan a aldo, mine cu SM Clark. Miparanun cung bagguia qñg pamañyatang cu carin uling e cu tatandan nung nanu lang oras mamuclat pablasang e na cu man casi maralas mamasyal careng malls. Pablasang e la pa macabuclat reng pasbul na ning SM Clark uling e pa oras, mausta mung manaya ca qñg tulid da ring pasbul cayabe la mu naman reng aliuang bisang luñgub. Isipan mu na mu ne, maracal la mu naman pala reng tauong maranun daratang queng SM. Agguiang iñyang magaral cu pa Menila canita, macanñyan la mu naman ugali reng tauo carin iñya pin mebigla cu iñyang acaquit cu ing anti ni qñg Pampanga.
Agguiang atna nang capili qñg lual uling matas ne ing aldo, ala pa mu rin bisang sumucung macatalacad qñg arap na ning pasbul ning SM Clark. Tabalu ta nung baquit agguiang binang macainip ing daraptan mi. Mula-mulala, macalaue queng marayu. Nanu caya ing isipan da reng security guard cabang acaquit da caming macatalacad qñg arap da? Mapallaring isipan da a ala caming acacarapat qñg bie mi at bisa cami mu rugung magparimla. Sabague, tutu y ni, dacal la reng lulub careng malls e uling atin lang saluan nune bang lumibut mu, magparimla, at malaue-laue mu. At patie meranup ca queng cacadurut mu quilub ning mall, ing mitatagan mung dinalan a pesus qñg bulsa mu, ume ya mu rugung pañialing apañgan mu carin. Uyta, carin ne menaquitan ing SM mall.
Dintang ne mu rin ing oras bang ibuclat da na la reng pasbul ning SM Clark. Balu yu nung nanu ing mallari caibat da lang binusni reng pasbol? Bala mu rugu manuc lang mecabulus careng culuñgan da, siglulu lang lulub. Caibat dang mecalub, atnong pañgabilis maglacad a bala mu rugu malacuan la queng tren. Agguiang atneng calualas ing quilub ning SM Clark, bala mu maibug la pang mitulacan at misigquilan. Pasibayu, macanñyan mu naman ing malillari careng SM qñg Menila, siglulu mu naman calub da. Maracal-a-dacal, macanñyan mu naman ing mararapat careng anggang malls mabilug a Filipinas. Macanñyan mu naman caya ing ugali da reng tauo careng aliuang bangsa anti mo qñg America ampong Europe? O reng mung Filipinung gagad reng maqui ugaling anti ni? Bala mu naman rugu ñgeni la pa mu menaquit shopping malls agguiang pang atin nang shopping malls careng pecasuluc ning Filipinas.
Macapagtaca, third world country ya mu rugu ing Filipinas dapot catmu yang mañgaragul a shopping malls. Ah, salamat na mu careng OFW ampong call centers!
Yng Sala