Bayung banua na naman uling mapupupus ne ing banuang 2016. Cabilis dang lalabas deng aldo, reng balang bulan, at deng banua. Apansinan cu na balang banua, a ala nang bitasang magpapacbung ñgeni e na anti iñyang mañga apulung banua na ing milabas a nung nu carin atin nang magpapacbung catuclu na ning bulan ning Septiembri. Tanda na niti ing pasaquit nang pasaquit ing bie, maguin neng alang alaga in pesus uling e man sasalese ing cabiayan. Acaquit queng susulung ing Labuad Capampañgan oneng culang pa mu rin. Mapallaring agad na cang macapanintun obra queng Pampanga oneng malati mu ing sueldu, mayap ya mung ilabas ing bie a alang atitipun.
Macañyan pa man, agguiang e cu man rugu mecaramdam agguiang metung mu man a acbung ning lamentarul, macabitasa cung atin pa mu ring magpapacbung queng new year's eve lalu na reng fireworks a magpalamuti queng maralumdum a banua. Tabalu mu nung iutus ang Pamuntuc Rodrigo "Rody" Roa Duterte ing baual ing magpapacbung queng banuang y ti. Mapallaring ali pa mu uling masaquit ya talagang ibaual ing magpapacbung neng bayung banua, masaquit ya pa mu ring ibili ing acasanayan na agguiang ating casaquitan ing bie. Caugalian na casi ing magpapacbung neng bayung banua at mañgailañgan pa mung macabang panaun bayu me atanggal ing anti canining caugalian oneng datang mu rin ing aldo a ala na mu ring magpapacbung neng bayung banua patie ala na taganang salaping silaban at lalu na nung iutus na pang Pamuntuc Rody Duterte ing baual ing magpapacbung neng bayung banua.
Anti mo qñg Davao City, e la magpapacbung carin neng bayung banua uling guinugul yang macabang panaun y Pamuntuc Rody Duterte bang bayuan ing ugali da carin iñyang mayor ya pa mu ning Davao City. Mallari mu ring arapat y ni qñg mabilug a Filipinas cambe da reng saup da reng mayor da reng balang balen lalu nang nung pagmulan na ñgeni ing pamamaual qñg magpapacbung neng bayung banua.
Mayari yang masaya ing banuang 2016 para qñg Labuad Capampañgan uling sasanting ing cabiayan queni pauli da reng dalan a liñualas da, reng bayung busning negosyu, at lalu na reng bayung busning call centers ampong factories qñg Clarkfield.
Masaplalang Bayung Banua, saganan ta yang masaya ing paratang a banuang 2017 uling balu cung maracal a mallaring mañgasanting qñg Labuad Capampañgan pauli nang Pamuntuc Rody Duterte cambe da reng lulugud qñg Capampañgan.
Yng Sala