Misan a aldo, mine ya y ning pacacalulung tauo qñg uspital bang palaue ne ing cayang blood pressure. Buri na mu rugung abalu nining tauo nung nanu ya ing cayang blood pressure oneng y ning doctor na, sinabi nang cailañgan ya canung iconfine qñg uspital. Mebisa ne man rugu y ning pacacalulung tauo a manatili qñg uspital uling y ta ing inusuc na caya ning doctor. E ca magtaca!? Palaue ne mu ing cayang blood pressure at saca ne quinonfine qñg uspital.
Maina ya talaga isip y ning pacacalulung tauo uling mebisa ne mang manatili qñg uspital. Mapalyaring uli na na ning cayang mababang pegaralan iñya e na na agguiu ning cayang utac bang misip pa. Sucat ca uaring mabisang manatili qñg uspital nung papalaue me mu ing quecang blood pressure!?
At queni na migmula ing camuritan na ning doctor. Quinera na ne y ning pacacalulung tauo qñg cama at silpacanan dextrose ampong inenjectiunan miayaliuang panulu. Quilub na ning silid nung nu carin ya macaquera y ning pacacalulung tauo, atin ya pang atlung cayabe a macarate carin. E cu balu nung nanu ing milyari caretang atlu pang tauo a macarate carin. Mapalyaring atin lang saquit o victim na la mu naman ning doctor. Milabas ing paruminggu a macaquera ya y ning pacacalulung tauo qñg cayang cama at iquit na lang tungal-tungal mañgamate rening cayabe na qñg silid anggang y ya mu ing mitatagan.
Dintang ing aldo a e ne miquimut y ning pacacalulung tauo. E na ne panamdaman y cayang mabilug a catauan dapot reng mata na na la mu reng cayang aquiquimut. Daramdaman na pa quing balugbug na reng tauong misasabi oneng pata ne ñgan y cayang mabilug a catauan. E ne mu rin macasabi rugu bang sabian na ing buri nang sabian. Yñyang dintang la rening cafamilia na nining pacacalulung tauo, quitnan de ing doctor nung nanung milyari caya. Yng paquibat na ning doctor, cailañgan ya canung operan ing buntuc na at metung canung milliun a pesus ing gugulan qng brain surgery ba yang e mate.
Uling pacacalulu la mu, e melaus ing brain surgery uling ala lang pamayad a metung milliun a pesus qñg doctor. Yñya inuli da ne mu ning cayang familia y ning pacacalulung tauo qñg bale ra. Magmalun la ñgan reng cayabe na qñg bale uling balu da nang mate ne y ning pacacalulung tauo. Pilan na mung aldo ing panayan at mamun ne carela. Calabas na ning paruminggu, meñgasdan la ñgan deng tauo qñg bale ning pacacalulung tauo at binang mitacutan. Y ning pacacalulung tauo, bigla ya tinicdo qñg cayang pagqueran at macasabi ne masalese.
Qñg malaguang salita, mecaquimut ne mu ring pasibayu y ning pacacalulung tauo a inatulan na nang camatayan nitang doctor. Baquit sinubli ya qñg dati nang diua y ning pacacalulung tauo? Uling meuala na la talab retang panulung pemanarac na ning doctor caya. Pepaprissiun ya mu rugu, oneng quinera ne ning doctor qñg uspital, penaracan nanu-nanu na mung panulu bang e ne miquimut, at sisiñgil metung a milliung pesus bang operan buntuc. Mataco ya talaga y ning doctor, menaquitan ne quetang pañgaconfine na ning pacacalulung tauo, caretang panulu a penarac na caya, bisa ya pang metung a milliun a pesus para brain surgery.
Casumañgid na niti. Male-male ta pa, bigla ya pa sang mete ing pacacalulung tauo cabang operan ne buntuc ning doctor nung sacaling mebisa la rening cafamilia nang mamayad metung a milliun a pesus. Mate ya man o ali, atin neng metung a milliun a pesus ing doctor.
Yng Sala