Yng Tigtigan Teracan Queng Dalan magaganap ya banua-banua qng tauling Sabadu ampong Duminggu ning Octubri. Megumpisa ya y ni inyang caibat nang memacbung ning bunduc Pinatubu a penimunan nang Alex Cauguiran cambe nang Edgardo Pamituan nung nu carin y ya pa ing casulungsungan a mayul ning Angeles City canita. Inyang panaun a y ta, malugma ya ing Angeles City at dimut mu ing capanintunan uling talagang dacal la reng mengasira pauli na ning panga-acbung na ning bunduc Pinatubu, caibat meco la pa reng Amercanu qng Clark.
Ayisipan deng lelangan ing Tigtigan Teracan Queng Dalan ban apasaya do reng memalen ampong munie sigla qng balen ning Angeles. Cambe na mu rin nita, ban mica pagasa la reng tauo carin a aguiu dang subling mibangun ampong sumulung qng gulut na ning casaquitan a daralanan da.
Nanu ne caya ing isipan da canita? Ayisip da ne caya canita ing maganap ya ing Tigtigan Teracan Queng Dalan banua-banua? Uling atneng casanting ing ayisip dang y ti. Mica atin yang bayung pagmaragul ing Capampangan uli na ning Tigtigan Teracan Queng Dalan a darayuan da pa reng tauo a menibat careng aliuang labuad mapa-aliuang bangsa ya pa. Mebantug yang tutu ing Tigtigan Teracan Queng Dalan uling aguiu tamung ipaquit careng sabla a alang sumbagal qng caburian tamung sumulung qng bie.
Pauli na ning Tigtigan Teracan Queng Dalan, miragdagan mu na man ing cabiayan qng balen ning Angeles. Bigla ya ping sinulung ampong mesigla ing balen lacuas na reng tauo na carin. Miragdagan ya mo caniti ing culturang Capampangan, dapot atin na mu namang anti caniting pamagsaya careng aliuang lugal, aliaua ya pa mu rin datang ing dapat na ning Capampangan a malyaring mayaus a sariling quecatamu.
Carin qng Tigtigan Teracan Queng Dalan, mayayagcat la reng miayaliuang taladalit ampon talatigtig at maralas careti cumpulan lang talatigtig a bina rang buri ding cabayangnan. Teterac la ampong mipanindac cabang pasilundag la queng babo ning stage deng dadalit. Cabang ating dadalit, titigtig ampong teterac, samal la mu naman reng dacal a miminum beer anggang susure na lang qng pamaglacad da. Isipan mu na mu nung macananu caragul ing apanaquitan na canini ning San Miguel Corporation.
Gaganapan de ing Tigtigan Teracan Queng Dalan qng McArthur Hi-way qng Balibago nung nu carin sasabatan de ing ing miatbang dalan. Inyang misan, guenapan de ing Tigtigan Teracan Queng Dalan qng SM Clark inyang bayu ya pa mung buclat canita. Ai, rugo! Calangi na po! Atin ya tang maragul a salapi ing miduang cang cayi inya pin carin da guenap. Balu ta na y ti, atin yang beyaranan canu ing SM. Caibat na nitang milyaring y ta, e da na gueua qng SM Clark ing Tigtigan Teracan Queng Dalan uling medala na la rugu.
Yng mung e masanting a malilyari qng Tigtigan Teracan Queng Dalan, y ya pin ing pamanagun da reng paratut a cabud na mu lulual careng lungga da. Atin nang tumbucan, acdacan, balbalan boti at nanu pa. Ynya neng misan, mayayaus yang Tigtigan Teracan ampong Tumbucan Queng Dalan. Dapat casi susian deng masalase ing lugal ban e la milulub reng mamulang.
Meyari ne naman ing Tigtigan Teracan Queng Dalan ning banuang casulungsungan at sana queng tutuquing Tigtigan Teracan Queng Dalan, pulus dalit Capampangan ing patigtig da, anti mu rin, mapayapa at masaya yang milalabas.
Yng Sala