Neng misan e mu tagana alaco ing capusungan aguiang macananu ya pa capali ing aldo, aguiang macananu ya pa cacaba ing pila, aguiang macananu la pa capali buntuc reng tauo quening merapat a alalan ning May 10, 2010. Neng misan tagana, e mu alaco ing maili ca capamilatan da reng cayabe mung manenaya queng pila.
Cabang macatalacad cami qng pila, atin dintang at mipalapit yang baguia qng pila mi. Yquit ne y tang caquilala na at nga nang mengutang, "Nu carin ya ing pila queni?", tambing ne mang minablas y ning caquilala na, "Uyta pa mung cari~in!", saca ne tutuldu y tang sepu na ning pila a e mu na acuang aquit uling atna neng cacaba. Mipacaili ya y ning mangutang at nga na namang migsiste, "Balamu pala, capanuldu cang baluga, ne!", "Ot macanian cang tutuldu!?", paquiapusan ne ing picucutnangan na, "Uyta pa mung cari~in!". Taganang maracal la reng tauo a tinagun quening alalan ning May 10, 2010, maligaga la ngan.
Inya namang caibat dang me-verify reng laguiu mi quetang verifier at peluban da na cami quetang silid ban carin lucluc at manenaya, linub ya y tang metung careng sasaup qng alalan at nga na namang sinabi, "Paunan ta la pu reng senior citizen!", macalaue cami ngan caya at ala namang bubulad. Mayap mung paunan na la talaga reng senior citizen uling maina no tud at e da na aguiu ing manenayang malambat. Caibat nang sinabing paunan no reng senior citizen nitang sasaup qng alalan, nga na na mu namang mengutang, "Retang pung senior citizen, magtas la pung gamat!?" Ai ba! Cabira magtas la ngan gamat pelalu reng anac-anac pa! Taganang patie mainip na cang manenaya, alub mu na mu namang mipauna carela. Mipatiman na la mu reng balang metung.
Inya namang peluban da na cami quetang silid a nung nu carin cami talagang manalal, a nung nu carin la reng counting machine, cabang macatalacad cami at panayan ming mirinan caretang cartun nung nu carin mi la den tanda reng iyalal mi, alben mi la retang meyari nang menganang tanda careng cartun da at papalub da no reng cartun da quetang counting machine. Caibat neng pengan ning counting machine ing cartun mu, manaya cang penandit angga qng ating misulat a "Congratulations" quetang LCD screen na. Caibat na nita at mirinan na cang indelible ink, meyari na ca qng pamalal at malyari na cang muli. Cabang alben mi ya y tang metung a pepalub qng cartun na quetang counting machine, bigla nang asabi ning qng cagulutan cu, nga na, "Dapat ating lumual a salapi quen caibat meng pepalub ing cartun mu!" Mipacaili na cu man, at nga cu namang mequibat, "Manialing botu ne!" Bigla ya rugung mipalaue canacu y tang election officer a mamieng cartun quecami. Y tang laue na, misdan ya queng dimdam na. Y tang balamu atin ping manialing botu, e ya man tiniman aguiang pabiru cu mung sinabi y ta. Idagdag cu na sanang sabian, patie y Manuel Villar ing inalal mu, ating libung pesus a lumual quetang counting machine caibat neng sinulat y tang "Congratulations". Caibat, patie naman y Noynoy Aquinu ing inalal mu, lima yang dalan ing lumual.
Caibat na ning macabang panaun, licuan ta ne ing pamanalal a manu-manu pauli na ning Republic Act No. 9369 a maqui pamansag a Amended Computerization Act of 2007. Tandanan ta ya ing alalan ning May 10, 2010 nung nu carin ya migumpisa ing Precinct Count Optical Scan (PCOS) a amanuan cu mu namang counting machine a ibat qng cumpaniang Smartmatic International Corp. (Smartmatic), a macapalalam qng Smartmatic International Holding BV ning Netherlands cambe na ning Total Information Management, Inc. (TIM) ning Filipinas. Anti mu rin, macapalalam ya canian ing Commission On Elections (COMELEC) qng pamanimuna nang Chairman Jose Melo. Manaua yang meyari ing alalan.
Yng Sala