Mapali ing pisasabian ñgeni diquil careng pulu ning Spratly manibat inyang miarapan la ring barcu ning Filipinas ampong China. Yng barcu ning Filipinas y ya pin ing BRP Gregorio del Pilar (PF-15) a binie ning America capamilatan ning Excess Defense Articles ampo ning Foreign Assistance Act uling lelele da na la mu carin ring barcung anti careti at alilan da la caretang palac bayu. Dati yang USCGC Hamilton (WHEC-715) ning US Coast Guard ing BRP Gregorio del Pilar (PF-15) oneng peglaco do pa mu reng mañgasican nang baril bayu de binie qñg Filipinas. Iñya pin balamu anti ya mung bacal a gato-gato qñg dayat malat rugu. Den namang aduang barcu ning China a maqui laguiung Zhonggou Haijian 75 ampong Zhonggou Haijian 84 a gagamitan da qñg pamagmasid reng sinalabat qñg BRP Gregorio del Pilar (PF-15) iñyang daracpan do sana re tang manasan a Isic. Quesa pin naman qñg maquilaban ya ing BRP Gregorio del Pilar (PF-15) careng barcu ning China, aisipan dang paburen na mu de tang daracpan da sanang manasan. Sabague, masaquit pin naman ing maquilaban lalu na nung atneng casican ing calaban mu, anti mo ing China a caduang pecamasalaping bangsa qñg mabilug a yatu, at cabilang mu rin careng amanuan dang super power anti ning United States of America. Nanu pin naman cayang ilaban na ning Filipinas a pacacalulu a cabilang naman careng amanuan dang third world country anti mo ing Sri Lanka. Misan nea mung panicdic ning China ing Filipinas.
Magsisi ya ñgeni ing Filipinas nung baquit sucat dong penabi reng Amercanu qñg Clark ampong Subic. At ñgeni mong pipilit ning China ing caburian na careng pulu ning Spratly, agad la mong pupulai reng alang marineng Filipinu qñg America ban mañiad saup. Quelan yung marine talaga! Agguiang mibarilan na la ring Filipinas ampong China, e ne man cabud maquiabe ing America, at lalu na ing sumaup qñg Filipinas. Uling nung milaban la ring America ampong China, anti na mu namang mica World War III. E mu y ta, nung milaban la ring America ampong China, y la mu rin reng mañgasaquitan uling mamasa ing cabiayan da qñg balang metung, o se balamu beril da la reng sarili rang bitis. Atin ya mu namang maragul a utang ing America qñg China, e ya man uari rugu dumine qñg China at cabud na nea mu sopan ing Filipinas!? Marayu yang sumaup ing America qñg Filipinas uling e ne man maulagang bangsa ing Filipinas. Agguiang milaco ya qñg yatu ing Filipinas, alang magmalun. Mapallaring ating mapilan a sumabing pañgadi ta ya ing Filipinas at magca-canuaring malungcut mo, dapot caibat na nita, acaliñguan da ne cabucasan.
At ñgeni, oreni reng caparatutan da reng mabuguc-buguc a Filipino!
Agcatan do mo reng aliuang Filipinu a e na saling nanu mang bague a megaua qñg China ban canita canu mibagsac ya ing cabiayan ning China. Ai, balumu naman uari rugu, cabud mu reng Filipinu reng sasali careng gueua ning China. Pota e yu balu a alus reng anggang tauo qñg mabilug a yatu reng sasali careng gueua ning China. Baquit? Anti macananu uari caracal ing asasali ning Filipinas a menibat qñg China. Agguiang tucnang lang mañialing nanu mang bague a menibat qñg China reng Filipinu, e na man rugu panamdaman ning China y ta. Yng catutuan na pin niyan, e ya man maulagang bangsa ing Filipinas caras qñg cabiayan ning China iñya pin pitapus-tapus nea mu ing Filipinas diquil careng pulu ning Spratly.
At saca pa canu, amuyutan da la reng businesses ban e na maginvest qñg China. Ta baquit uari, ninu uaring Filipinu a agguiu nang maginvest qñg China!? O pota galang, reng investor a Amercano reng amanuan da. Ai ba, palague yu uari maquiramdam la reng Amercanu careng Filipinu agguiang ditac mo!? Palac neng cailañgan ning Filipinas reng investments na ning China at ali ing China ing mañgailañgan careng investments na ning Filipinas uling ala ne mang mallaring i-invest ing Filipinas nune ing magparala mung ipus ampong prostitutes. E da balu ing pañiabian da reng Filipinu.
Bisa yang saling labing aduang F-16 ing Filipinas qñg America. Mayap na mu pala atin yang salaping pañialing F-16 ing Filipinas, o pota galang utangnan na la mo!? At nung mecasali ya man, atin ne man cayang salaping gugulan ban panatilian nong masalese reng F-16? Uling atno rugung cacamal panatiliang masalese reng F-16. Caras naman careng balas ampong missiles da reng F-16 a reni, nanung salapi ing pañiali ning Filipinas? Uling nung ala, maguin la mung bacal a sula-sulapo qñg babo banua. Ah! Balu cu na, uling ala lang missiles a pañiali, pasaquen da na la mu reng pilots da at saca la magkamikaze. Ai, rugo ne! Casaquit na na ning bie qñg Filipinas, e mu na balu nung nu carin da la bubulsa reng buis mung babayad. At macabitasa cung atin pang cacorriatan a marapat qñg pamaniali careng F-16 a reni agguiang macatibis ne qñg patayan ing Filipinas. Yng Filipinu pin naman, caras qñg cacorriatan, e bisang paylacuan.
Micasuelu cung manalbe qñg lumpuñgan da ring Isic a mamañgan noodles salang caring Filipinu a mamañgan pagpag. At taya cu, dinan mu la mung metung a aldo ring Isic, at mañgamanu na lang Mandarin reng Filipinu.
Yng Sala