Anti na na ning isipan cu canita, e na ne calupa ing pascu ñgeni canita. Binang masaquit na casi ing bie at pilit na mung pamagguiu ing nanu mang atin quing bulsa. Ñga ra pin ring aliua, "It's the spirit of Christmas" na mu canu.
Nung apansinan yu mu naman, bina la mu namang mañgalagad reng memañyabit parul ampong christmas lights careng pibale-bale da. Tia magcanu no caya reng parul ñgeni? Uling nung reng parul qng Sam Fernandu reng buri mu, canita pa mu atna nong pañgamal deta. Ñgeni pa caya? Canita namang iñyang dacal la pa reng duty free shops quing Clark, carin la pupulai ring mañialing christmas lights ampong pagtau da. Tabalu ta ñgeni at e cu na buri mang paquibaluan pa. Anti mu rin, malagad na la mu naman reng patigtig dalit pampascu. Cabud ya mu rugu metung ing dimdam cung petigtig dalit pampascu. Mapalyaring ala na mu ring spirit of Christmas.
At iñyang Sabadu bayu maspascu, dacal la reng mine careng supermarket dapot e naman mipalalung cacaba reng pila careng cashiers, balamu y ta mung aldo a ibat lang migsueldu reng magobra.
At atin na cung iquit a mapilang mamisaling papacbung, at iñyang Sabadu ning beñgi bayu magpascu, mig-anti mong bayung banua uling dacal lang bigla reng megpapacbung. Atin cu pang iquit a papacbung a macacaun at ñga nang macasulat careng mañgaragul a letra, "Made In Bulacan". Nu carin la pa caya manibat reng alus papacbung nune carin.
Manaliua ne cabaldugan ing pascu ñgeni. Meguing neng business ing pascu careng anac ampong peñgari mu naman. Agad da lang gagayac reng anac da bang maquipamascu careng anggang caquilala da at ing sablang buri da mu ing panayan da lang iduang ring pamascung salapi careng anac da. Caibat na nita, pisabian da na reng peñgari cabang atiu la quing obra da nung magcanu ing ayabli da. Singcadagul la pa mo penaquitan. Neng misan pa, mabibigla nea mu ing casabi dang peñgari nung baquit canu atne mung calati ing icua dang pamascu. Ampong lalu na, e la mauala reng manulid careng bale a meguing mu namang business.
At ing pascu, meguin nea mu namang karaoke concert. Ai, misusumañgid a karaoke at singcasican la pa reng alang marine, e la pa mo biasang dalit, deigan do pa reng mañgalasing. Nung atin cu mung AK-47, icua cu na lang pemalis quing metung a magazine round. Careng anggang aimbentu da reng Apon, mapalyaring ing karaoke na ing peca alang silbi lalu na nung miras ya careng putanaida rang alang marineng Filipinu.
Yng Sala