Catlu neng SM City cañian ing tatalacad dang bayung caduang SM City qng cabalenan na ning City Of San Fernando queti Pampanga. Parating atin sasalansang agguiang capilan ya patalacad shopping mall na ing SM qng Pampanga. At e mu cabud bula asbuc ing pamañialansang andat patalacad yang shopping mall ing SM qng Pampanga nune maragul a pamañialansang ing malilyari uling dacal la reng tauo a e miqui buring mica maragul a shopping mall qng Pampanga uli na ping a e patas ing labanan careng mañgalating tindañgan. Masaquit na carela ing manintunan uling mañgalati la mu pin, lalu da pang pasaquitan reng mañgaragul a shopping malls. Pauli na ning maragul a pamañialansang qng pamanalacad SM malls, midadame no reng media ampong government agencies ban mamilatan. Calupa na ning caduang tatalacad dang SM City qng Sam Fernandu ñgeni, dacal la mu naman reng e bisa o e maqui buri nung macananu deng italacad ing bayung SM City. Dapot agguiang dacal la reng sinalansang, mibalaus ya pa mu rin ing bayung SM City qng cabalenan na ning Sam Fernandu.
Baquit mo pin caya agguiang dacal la reng sasalansang careng mañgaragul a SM City nang Henry Sy Sr., mibabalaus la pa mu ring mitatalacad deng malls na qng Pampanga!? Masaquit a cutang a maqui malaguang paquibat. Uling cailañgan nang Henry ing dacal ya salapi iñya agguiang dacal la reng sasabat careng pamanalacad nang shopping malls qng Pampanga, susulung ya pa mu ring y Henry at alang macapatucnang caya.
Yng catutuan na niyan, e ta la cailañgan y tamung Capampañgan reng shopping malls a ren at y Henry Sy Sr. cambe da reng cayang investors reng maqui cailañgan quecatamung Capampañgan. Nung buri ta ya ping siclaud qng arapan tamu y Henry, tambing yang siclaud at panuman na catamu pa talampacan ban na la mung apatalacad reng shopping malls na queti Labuad Capampañgan. Ai rugo! Sinapac neng mañgaragul a shopping malls ing Capampañgan at e la pa bisang tucnang reng mañgasalaping a reni. Patie pin naman salapi na ing pisasabian, e la paypiguil agguiang tiran mo pang tandus. Burian da pang mituran lang tandus ba da la mu sang apatalacad reng carelang mañgaragul a shopping malls.
Masampat mung maquinabang tamung Capampañgan careng panalacad dang shopping malls a ren. Dapat tamung gauang batas nung nu carin ing Amanung Sisuan ing gamitan da reng magobra da at lalu na careng mamisali da. Uling nung e la mañgapampañgan reng magobra da careng egana-ganang SM City malls qng Labuad Capampañgan, milaco la license ban mamusni pa ba dang abalu a e ta la cailañgan at salapi mung ing capagnasan da. Baquit uari, manalacad ya uaring SM City malls na y Henry qng Pampanga ban sopan no reng Capampañgan!? Buguc da!! Salapi mu ing capagnasan da ren iñya agguiang nanu pang pagaua mu carela, pamintuan dang agad ba la mu sang macapanalacad careng mañgaragul dang shopping malls. Iñya nung e la bisang mamintu, icabat la reng shopping malls da ba lang alang apanaquitan. Ta baquit!? Yng SM City mu uari ing ating shopping mall. Casuelu da ri John Gokongwei ampo ring Ayala nung mauala ya ing maragul dang calaban! Caracal da pu rugu reng sinalansang iñyang minuna deng telacad ing SM City qng Sam Fernandu dapot e la man tinabang lub nune lalu la pang mesiring manalacad dacal a shopping malls. Iñya ambusqui nu carin ca maliquid qng Labuad Capampañgan, pulus na mu shopping mall ing acaquit mu.
Yng Sala