Y Juan a Tagalug, magobra yang talabante quing metung a pisimpanang salapi quing Caloocan. Misan a aldo, igcat deng minum reng cayang caluguran a Tagalug la mu naman qng bale na ning metung caring caluguran na. Masaya lang miminum, mipagsalita, ampong mipagdalit. Maingie la ngan at macayabala careng siping dang bale at milupalupa la ngan Tagalug carin. Oneng ala no mang acarapat reng siping dang bale agguiang buri do mang sabianan. Obat mo e do asabianan ri Juan a Tagalug ban ina dea mung bagia ing carelang patigtig ampong gulisacan!? Yng paquibat, uling atin lang panugaling dunut reng Tagalug a amanuan dang "pakikisama". Aliua la talaga utac reng Tagalug, mayap ne ing macayabala la careng para rang tauo ban la mung mipanusigan qng pansariling rang camuritan uling nung ali, palaguan reng alang "pakikisama" ing sasalansang carela. Mayap ya careng Tagalug ing dapat cang carocan ban ca mung masabing atin cang "pakikisama".
Ynyang misan, atin namang micacalugurang Tagalug a mipanagcat munta quing metung a lugal. E la micasundu reng murit uling atin carela ing bisang munta quetang metung a beer house a pane rang papasyalan cabang ing buri naman ning metung a munta naman quetang bayung beer house a cabubusni pa mu inyang nacadua. Cabira, bigla neng simbitla ing "pakikisama" ning metung careng bisang munta quetang sadia rang papasyalan. Queni na pu migumpisa ing bungilan da reng murit. Minablas ne man y tang bisang munta quetang bayung busning beer house, dapat canu y la reng ating "pakikisama" caya. Ay ba, misdan la retang casumangid uling beligtad ne ing cabilian ra. Guinamit ne ing sarili dang panugaling dunut ban salansangan ing caburian da re tang bisang munta quetang sadia rang papasyalan.
Caibat na ning paruminggu cabang atiu qng obra y Juan a Tagalug, dintang ya ing metung careng caluguran nang acayabeng minum canita. Dapot e ne dapat paluban quing quilub na ning mula ning cumpania, agad na ne mang pepaluban Juan ban canita queta lang quilub misasabi. Uli mo sang pambengi ya y Juan quing obra na, matula yang acacasalita ne ing cacasi na quing quilub agguiang masipit nang babaual ning cumpania a ala dapat aliuang tauo ing milulub carin uling pota ating mangabating a gamit carin lalu na uling pisimpanan yang salapi o bancu ing babanten na. Pablasang quing ugali rang dunut reng Tagalug a "pakikisama", alang nanu-nanu mu cang Juan ing e pamamintu quing utus na ning cumpania. Ban mu sang masabi yang ating "pakikisama" quing cacaluguran na, e ya micacunung paluban ne quing quilub na ning cumpania. Meralas ing macanining dapat nang Juan a Tagalug angga quing atin nang mababating quing pibandian na ning cumpania at carin ne metucal y Juan a Tagalug a alang masabal quing obra na at cumpania ba ya mu sang mipanusigan ing ugali rang dunut.
Ynyang panaun a atiu la pa reng Amercanu quing Clark, agguiang macananu me pa cacasi ing Amercanung magbante quing Main Gate, e na ca paluban agguiang misan nung ala cang dapat puntalan quing quilub na ning Clark Air Base. Agguiang atdanan me pang Fundador o metung a caja ning sigarillu ing Amercanung magbante quing Clark, e ca malyaring magnasang milub carin. E na calupa ning Filipinu, atianan mea mung metung a sigarillu, milub na cang alang nanu-nanu quing quilub.
Salamat na mung maragul at ala lang ugaling macanian y ta mung Capampangan at maulaga quecatamu ing carangalan. Luid ya ing Capampangan!
Yng Sala