Ñgening daratang a School Year 2012-2013 (SY 2012-2013) magmula qñg bulan ning Juniu, magmula da neng palacad ing amanuan dang K-12 curriculum ning Department of Education (DepEd). Bayu yang curriculum ing K-12 at e ne caugne nitang luma. E ya man pamipasanting na nitang luma. Nung uari, iyugse da ne y tang luma at ing bayung K-12 na ing icana da. Kindergarten anggang Grade 12 ya ing buri nang sabian ning K-12.
Yng maragul a pamagbayu a marapat qñg bayung K-12 curriculum, y ya pin ing pamanuru da qñg Amanung Sisuan anting subject careng anggang pipagaralan qñg labuad ning Capampañgan, at gamitan dea mu rin y ti qñg pamanuru da reng talaturu careng anggang subjects bucud qñg national language a e pa mibait ampong amanung English. Pulus Capampañgan ing gamitan da magmula careng magaral a Kindergarten anggang Grade 1, Grade 2, ampong Grade 3 at ya pin y ni ing ausan dang Mother Tongue-Based Multilingual Education (MTB-MLE).
Yuyugse da ne y tang lumang curriculum uling e ya migtagumpe uling gagamitan de ing national language ampong English qñg pamanuru da a pamagcasaquitan dang intindian naman deng magaral. Masaquit casi ing tuturu ca qñg amanu a mumunang dili e da man aintindian deng casabi mung magaral. Agpang qñg maracal at maluat a pamagaral, apatunayan dang lalu lang mabibiasa reng magaral nung ing Amanung Sisuan da ing gagamitan neng magaral la. Patie ing Amanung Sisuan ing gagamitan da qñg pipagaralan, agad dang aintindian reng magaral ing tuturu ning carelang talaturu uling agad yang macaisip ing carelang utac. E na calupa nung English ya ing gagamitan qñg pamanuru, ilicas ne pa mu qñg Amanung Sisuan ing utac ning magaral ing sasabian ning talaturu bayu ne aintindian. At lalu ya pa rugung mañgasaquitan ing magaral qñg pamanintindi qñg tuturu na ning cayang talaturu nung maina ya qñg English.
At dapat sana, cambe na ning pamagbayung mararapat qñg pamagaral da reng anac, iyugse da nea mu naman ing ausan dang national language uling alang milyari caniti mangga man ñgeni. Mañiayang ya mung panaun at pagal da ring magaral, masasayang mu naman pati reng salapi ning guviernu. Nanu uari ing alaga na ning national language qñg bie da ring tauo qñg Filipinas? Yng national language a e naman tutung national language uling Tagalug ya ing tuturu da. Yng buri nang sabian, national language de reng tagalug. Nanan me uari ing anacputang Tagalug, gamitan me uari patie magaral cang medicine, engineering, at aliua pa? Patie maintun cang obra, nanu ing paintunan da reng cumpañia? Paintunan da re tang biasang magEnglish, ale!?
Reng amanu, sangcap na la ning tauo o ning bie na ning tauo. Yng Amanung Capampañgan sangcap ne ning pangatauo tamung Capampañgan, gagamitan ta ya ban acasabi ta la reng para tamung Capampañgan, at sangcap ya qñg aldoldo tamung pamibiebie uling macatatac qñg amanu tamu ing cabiasnan a pepamana da quecatamu ring pipumpunan tamu.
Bucud pa qñg sarili tamung Amanung Sisuan, cailañgan ta ya mu naman ing amanung English uling casangcapan ya mu naman ban acasabi ta la reng aliuang tauo qñg bangsa ampo deng tauo qñg mabilug a yatu. Casangcapan ya mu naman ing English ban abalu pa reng aliuang cabiasnan uling ing English ing magagamit careng alus anggang beluan queni yatu. Anti mu rin, nung cailañgan ta pang mabiasang catlung amanu, pagaralan ta ne pin man ing Cantonese o caya Mandarin uling metung la ñgeni careng mumusbung a maulagang amanu a dapat apagaralan at ali ing Tagalug. Pasibayu, ali ing Tagalug uling ala ne mang alaga ing Tagalug, amanu dea mu reng alang acarapat qñg bie, ing amanu ban lalu lang maguin mulala reng tauo, at casangcapan bang amurit da ca qñg filipino nationalism (tagalug nationalism).
Qñg malaguang salita, ing Amanung Capampañgan bilang sangcap ning pangaCapampañgan tamu, at reng English, Cantonese, at Mandarin bang mayan tamung macapanintun obra.
Yng Sala