Balictad la talaga utac reng Filipinu at mulala la pa uling macasalungat qng mayap a pamanisip ing daraptan da. Anti mo iñyang milabasan a alalan, masayang ya mu canu ing botu da nung ibie de canu quetang buri dang tatagal oneng marayu ne man canung lumput.
Nanu uaring malyari queca nung iyalal me y tang taganang buri mu at carapat-dapat, caibat e ya limput cayari ning alalan!? Mabauas la uari reng salapi mu queng bulsa mo!?
Nanu uari ing malyari queca patie binie me ing botu mu quetang tatagal a e naman carapat-dapat sumambut!? Baquit uari, atin cang tanggapan a salapi patie sinambut ya iñya isipan mung masayang ya mu ing botu mu patie binie me quetang tatagal a carapat-dapat naman dapot marayu yang sumambut agpang queng macabalictad mung utac!? Nung macañian ca pin talagang mimisip, lalu ya ping e lumput y tang carapat-dapat a sumambut pauli ning camulalan mu. O nung dinalan cayung anti cañian mimisip, o se dinalan na lang botu reng mesayang!
Pablasang reng Filipinu talaga, agad mu lang apapaniuala qng camuritan uling casing dagul ya mung panas ing utac da. Pablasang sinabi da qng radju, TV, o survey; uyta na ing catutuan carela. E da na buring gunam-gunaman pa bang abatas nung tutu o ali. Sabague, nanu pa uaring ayasajan mu careng casing dagul utac panas!
Anti mu rin, patie ating sinabing pulus lang prostitutes reng Filipinu, agad la mong manamdaman reng digpa ning alting Filipinu at saca la mo mibabua qng mua. At ing agad da pa mong ipaquibat; agguiang canung careng aliuang bangsa, ating prostitution.
A! Macañian!? Nanu na namang pamanisip y ni!? Yng buri na mung sabian nini, uling atin naman palang prostitution careng aliuang bangsa, ing buri nang sabian mayap naman pala ing prostitution uling daraptan da careng aliuang bangsa. Iñya pin uyta na, apagmaragul na ne ing pañgafilipinu na agguiang pugad yang prostitutes ing Filipinas uling daraptan da naman pala careng aliuang bangsa.
Qng malaguang salita, nung nanung daraptan da qng aliuang bangsa agguiang pang maroc, daptan na mu naman ning Filipinu uling atin mu naman palang aliuang tauo careng aliuang bangsa a darapat camuritan. Y yan ing utac Filipinu - cautac murit, maquiapus queta - maquiapus caya, baual ing mimisip - baual ing ating catuliran. Ninu uaring sinabing uling daraptan da queng aliuang bangsa, mayap nang tambing y ta at dapat mu namang paquiapusan, o caya e mu ne samasnan ing sarili mu!? Sabague, nanu pa uari ing agguiu nang isipan ning casing dagul utac panas.
Yng Sala