Inyang berilan de y Benigno Servillano "Ninoy" Aquino, Jr. qng tarmac na ning Manila International Airpot (ing laguiu na pa ning airport canita) inyang August 21, 1983; e de man balu nung ninu ya y Maria Corazon "Cory" Cojuangco Aquino, ing asaua nang Ninoy.
Uli na ning pangamate nang Ninoy, mequilala ya y Cory qng mabilug a yatu. Queni ne megumpisa ing amanuan dang People Power Revolution nung nu carin apaculdas de y Ferdinand E. Marcos at meguin neng pamuntuc ning Filipinas y Cory.
Y ya ing tinalacad bilang calabingmetung a Pamuntuc ning Filipinas manibat inyang 1986 anggang 1992. Y ya ing pecamumunang Pamuntuc a babai ning Filipinas ampo ning mabilug a Asia.
Atnang casaya canita uling ating maragul a pamagbayu a milyari qng pamibiebie da reng tauo qng Filipinas. Meuala na ing tacut careng sundalus nang Marcos uling binaligtad na la qng malda. Atna la mu namang capamintu reng tauo, y tang balamu mica bayu lang pagasa qng bie. Patie sasaque ca careng dzip, pipila lang masalase reng sasaque, e la misasamsaman.
Bala da mu naman reng tauo canita, y ta na ing umpisa na ning masanting a pamaniulung ning Filipinas, ali pala, lacuas ya pang mipacaroc. Lacuas yang mesaquit ing cabiayan, meracal la reng mangaroc, dacal ing patayan, capanacauan, mabuluc a politics, ampong miayaliua pang carocan qng memalen.
Rng sadiang cacampi nang sundalus Cory, y la mu naman reng linaban caya. Memag-coup d' etat lang macatapilang ulit. O se map na mu, e la migtagumpe.
Quinuldas yang manaua y Cory qng pangalucluc na bilang Pamuntuc ning Filipinas at y General Fidel Valdez Ramos o FVR ing quinanlas que ya.
Maracal a panaun ing mengalabas, meyari ya mu rin ing panaun na ning pangapamuntuc nang FVR, at y Joseph Ejercito "Erap" Estrada naman ing menalili caya. At ngeni, y Pamuntuc Gloria Macapagal Arroyo na ing macalucluc.
Pabanua nea mu ring pibabatang Cory ing saquit nang cancer qng colon anggang qng sinucu ne ing catauan na qng cardio-respiratory arrest inyang aldo ning Sabadu, August 1, 2009, 3:18 ning ganingaldo at malaus neng memun qng yatu.
Mamun na queca mal ming cabalen, binang dacal na ca mu ring asaup. Nuan na ca ning mayupayang miglalang.
(January 25, 1933 – August 1, 2009)
Yng Sala