Masuelu ya ing ing Capampañgan uling atin yang aduang pecamayupayang babai at e la mu y la reng pecamayupaya qng labuad ning Capampañgan nune pati na ning qng mabilug a Filipinas. Nanu man ing burian da, marapat a alang sumbagal. Nung nanu man ing aduan tamu carela, aibie dang alang casaquit-saquit. Milupa lang matas a pegaralan, biasa, masalapi, at masicanan qng politics. At cambe na niti, mirinan la mu namang upaya a menibat quecatamung Capampañgan uling dininan ta lang mañgaragul a bilang inyang milabasan a alalan ning May 10, 2010.
Isipan yu na mu nung macananu caragul ing arapat da reng aduang a reni uling nung ing mung metung carela atna neng casican a upaya ban daptan na ing nanu mang burian na, ñgeni pa cayang adua la pa. Inya pin nga na nitang mapusung a quesabian "Seselan na ca mu!"
Ninu la pa uari reng amanuan cung pecamayupayang aduang babai ning Capampañgan nung aliua ri sadiang pamuntuc ning Filipinas at ñgeni congresswoman na ning caduang district ning Pampanga a y Gloria Macapagal-Arroyu at ing sadiang senior board member ning Pampanga at ñgeni governor ning Pampanga a y Lilia "Baby" Pineda. O! Nanu? E tuto a y la na ñgeni reng aduang pecamayupayang babai e mu ning labuad Capampañgan nune pati na ning mabilug a Filipinas!? At ñgening atin tamung Gloria Macapagal-Arroyu ampong Lilia "Baby" Pineda, balamu mica adua tamung tatalañgan a governor ning Pampanga at bina queng buri ing merapat a y ni. Adua lang bubusuc qng upaya reng cacanlung quecatamu.
E cu balu nung macananu queng idatuc qng pusu cu ing tula cu uling ing congresswoman na ning caduang district ning Pampanga, e ya mu cabud congresswoman nune sadia yang pamuntuc ning Filipinas. Aguiu na ñgang maquiablasan careng anggang mañgabiasa ning mabilug a yatu. Ñgeni pa mu milyari ing ati canini, a ing metung a pamuntuc ning Filipinas meguin ta yang congresswoman, at y tamung Capampañgan ing minunang mecagaua caniti. Aguiang capilan naman, alang macasaul quecatamu ne! Angga ñgeni, pamuntuc ne pa mu rin ning Filipinas ing laue tamu cang Gloria Macapagal-Arroyu at uli na nita, atin ta nang pamuntuc, atin ta pang congresswoman.
Cabud na mu menabu ing calam careng gamat tamu a balamu menibat qng banua. Pelalung reng aliuang politicians ampong businessmen qng quilub at lual ning Filipinas, tatalañgan at gagalañgan da la reng aduang a reni. Pauli da reng aduang micaluguran a reni, aguiu de pang lacuas pasuluñgan ing Pampanga. Ing anggang cayapan, miras ñgan quecatamu. Idagdag ta ya pa ing casulungsuñgan a pamuntuc ning Filipinas a y Benigno "Noynoy" Aquino III ning Tarlac. Malagua ta ya pang asaguip ing Amanung Sisuan uling nung burian da mu, ayutus dang ituru ya ing amanung Capampañgan careng anggang tauo qng Filipinas.
At nung pica-caian, ñgening panaun a y ni, masagli ta ne abalag ing Filipinas at manalacad nang sarili tamung bangsang Capampañgan uling atiu na la ri Gloria Macapagal-Arroyu ampong Lilia "Baby" Pineda ban maguing pun ning bangsang Capampañgan. E cabud daratang ing anti canining pamicatagun ning panaun a atin tamung aduang pecamayupayang aduang babai a atiu na ñgan carela ing cailañgan na ning bangsang Capampañgan ban magsarili.
Macanian talaga, nanung acarapat da reng aliua nung ing Capampañgan, lelañgan ne ning yatu a pecamayap at pecabiasa careng sabla. Ing masican dang upaya ring adua, upaya ta mu naman! Yng upaya ning Capampañgan, caren ya mung Capampañgan!
Yng Sala