Bayu ca miras qng Main Gate na ning Clark Field, dalanan me pa mu ing Astro Park. Bayu de telacad ing SM City Clark carin, atneng cachura ing Astro Park uling cabud ya mu malañging maricut a pasyalan. Agguiang inyang ati lu pa reng Amercanu canita, machura ya pa mu rin ing Astro Park. Qng malaguang salita, agguiang qng macabang panaun a pamagdatun na ning 13th Air Force ning mayupayang America carin, e de icuang apasanting ing Astro Park. At pilan na la mu rin deng meguing mayor na ning Angeles City, ala agguiang metung man carela ing mecarapat a pasantingan de ing Astro Park.
At dintang na mu rin ing panaun a patalacad ya mu namang SM City na y Henry Sy qng quilub na ning Clark at inacu na mu naman ing pamagpasanting at pamanibala qng Astro Park. At canita mu rin, qng quilub na ning macabang panaun, icua na mu ring mesanting ning Astro Park pauli na ning SM City Clark nang Henry Sy. E ne malañging maricut a mula ing Astro Park ñgeni uling menanaman nong dacal a mañgasanting a tanaman, pane na lang matutugtug reng dicut at manatili lang mayalutiag. Atin nang piluclucan qng palele-lele, ampo pang pipulayan neng abac a maranun. Pepalub da nea mu naman ing Salacut qng quilub na ning Astro Park a atiu qng calubudtaran na niti. Atin nang maglinis aldoldo qng quilub ning Astro Park ampo pang magbante pa.
Dapot, quing quelambatan na naman ning panaun, lupa yang chuchura ing Astro Park. Baquit a'mo? Nung atiu ca qng arap ning Astro Park, apansinan mo re tang telepayung a tanaman. Pitu la re ta at manayun no mang acaquit carin, oneng acaquit mu la mu naman re tang pacasabit caren? E uari atnong caplas qng panimanman!? At nung dumalan ca qng 1st Street, ya pin y ni ing dalan qng uanan mu nu macayarap ca qng Astro Park, aquit mu la carin deng mairong jeep a pacatucnang carin. At sumulung ca pang baguia, aquit mu no man reng barung-barung a memañiulput carin. Ai rugo ne! Obat pepaburen na ning manibala qng SM City Clark ing mitalacad la re ta carin. At ninu reng menucluanan a ren!? Ninu pa, o se reng dayu na naman a alang arapat qng sarili dang provincia at queni la Pampanga sasacsac, at dinatan de ing Labuad Capampañgan. Reng alang marine! At patie luñgub ca qng quilub na ning Astro Park, dacal na ca mu naman aquit a plastic a sula-sulapo.
At metung pang maplas qng mata, obat macasulat ya qng babo ning pasbul ning Clark ing "Mabuhay Freeport Zone"!? Talagang ala yang marine ing mecaisip caniti. Ninu man ing pamuntuc ning Clark Field ñgeni, paquilaco yu ne mo y ta at alilan yeng "Luid Clark Freeport Zone".
Yng Sala