Canyaman na yata ning malilyari qng politics ning Filipinas ngene?! Pepasiag na nang Governor Among Ed Panlilio ing caburian nang tagal pamuntuc ning Filipinas qng daratang a alalan ning 2010. Bantug ne naman ing Labuad Capampangan canini pauli nang Among Ed.
Casulungsungan yang lalaguitic ing laguiu nang Among Ed at maracal la tagana reng maqui buring maniambut ya. Madacal a dacal, ating yang capaniambut y Among Ed qng cabilian na ngeni. Nung itapat ya mu careng bisang tagal pamuntuc ngeni, alang lang panama cang Among Ed. Yng atin damu, maracal a salapi, ing mayupayang salapi. Yng salapi ing punsalan nang Among Ed qng laban a y ni. Oneng sabague, e mu naman ing salapi ing lalauen ban cang maniambut qng pangapamutuc nune reng manalal queca. Aliua na la ugali reng tauo queng Filipinas caras queng pamanalal. Biasa na la mu namang mamiling masanting a manuc. Macanini ya miniambut y Pamuntuc Gloria Macapagal-Arroyu.
E la pa macayabe quen reng malyaring sumaup caya calupa da reng NGO, reng aliuang masalapi a maqui buri cang Among Ed, reng balang metung, reng pisamban...ampo pa y Pamuntuc Gloria Macapagal-Arroyu (male tamu).
Caibat na niti, mapalyaring maguin neng parliamentary ing goviernu ning Filipinas. Tagal ya canitang congresswoman y Pamuntuc Gloria Macapagal-Arroyo qng caduang district ning Pampanga (Lubao, Guagua, Sasmuan, Floridablanca, Sta. Rita, ampong Porac). Angguiang pang ninu ing acalaban nang Pamuntuc Gloria Macapagal-Arroyu carin, e la maniambut. Uli na niti, maguin yang Pun Minister y Pamuntuc Gloria Macapagal-Arroyu. Lacuas yang sinanting ne?!
Atin pa! Ninu naman caya ing cumanlas qng capitoliu? Ala nang aliua. Ninu pa?! O se y Oscar "Oca" Rodriguez?! Ala ya mu namang casambut y ni abe.
Capampangan! Miyabe-abe tamu! Miagnan-agnan talang itas gamat ri Pamuntuc Among Ed Panlilio, Pun Minister Gloria Macapagal-Arroyo, ampong Governor Oscar "Oca" Rodriguez. Ua, ala pa man. Dapot masampat yang tinap-tinapan ing bagueng mapalyaring mipaltutu uling bina neng malapit queng catutuan.
Angguiang capilan, e ya talaga pailacuan ing Capampangan, parati yang manimuna, alang macapante. Capampangan, luid ca!
Yng Sala