Maralas neng pisasabian ñgeni ing ibuclat ya ing economy ning Filipinas qñg paralan a ilaco ya qñg constitution ing mamaual careng daiwan bang macabanding 100% careng businesses. Y ti bang dacal la reng mamujunang negosianting daiwan queng Filipinas. Pauli na niti, dacal la reng micaobra.
Agpang queng 1987 constitution na ning Filipinas, e la mallaring mamanding dinalan a por ceintu careng nanu mang business queng Filipinas reng daiwan iñya malagad la mu reng daiwan a bisang maquipagsapalaran. Mallari la mung mamanding apat a pulung por cientu na ning business at quen yang Filipinu and mitatagan a anam a pulung por cientu. Nung y ca pin naman rugu uaring daiwan, cabud na ca mu uaring mabisang idaque me ing business mu quing metung a Filipinu? Anta nu mong ala cang caquilalang Filipinu a mallari mung apagcatiualan?
Maralas careng daiwan a macapagnegosyu quing Filipinas, retang mecapaquiasauang Filipina. At maralas mu naman a masasalaula ya mu ing negosyu uling ing Filipina nang asaua ing tatalan. Yng masaquit na pa nita, maquisoso pelalung reng camag-anac na ning Filipina iñya lalu yang mibabagsac in negosyu.
Pauli na ning pamamaual careng daiwan a macabanding dinalan a por cientu careng businesses, e la mu naman macabanding dinalan a por cientu careng gabun. Nung baquit? Alimbaua, bisa yang manalacad pipañgauan o factory ing daiwan, dapat mung sali yang gabun nung nu carin ne italacad ing factory.
Dacal la reng mulalang Filipinu a sasaluñgat bang ibuclat ya ing economy na ning Filipinas. Yng mumuna dang sangcan, atna ne mu pin canung calati ing Filipinas, paburen la pang macabanding gabun reng daiwan. Quing malaguang salita, ing buri dang sabian lati ya canu ing Filipinas patie sinali yang gabun ing daiwan quing Filipinas. Tacnaida rang muret! Macananu ya cayang lati canita ing Filipinas!? Nanu uari ing pamialiua na patie sinali yang apulung hectarias a gabun ing metung a Filipinu ampo pa nung sinali ya mu namang apulung hectarias a gabun ing metung a daiwan. Yng apulu nang hectarias a gabun ning daiwan, manatili ya pa mu rin naman quilub ning Filipinas. Yñya macananu yang lati ing Filipinas a sasabian da reng mamurit-murit a Filipinu. Bala mu naman uari, apulayi ne ning daiwan ing apulung hectarias a gabun pauli qñg bangsa na. Nang' palague da caya, ibulldozer ne ning daiwan ing apulung hectarias a gabun at saca na iyacot!? At isipan yu na mu, macananu neng apatalacad ing factory nung acutan na ing gabun pauli qñg bangsa na a e na man mallaring daptan.
Agguiang ninung saling gabun quilub na ning Filipinas, ing gabun manatili ya qñg Filipinas. Reng ley na pa mu rin ning Filipinas reng mipamintuan quilub na ning gabun agguiang daiwan ya pa ing maquibandi. Bala mu naman uari, ing uatauat na ning bangsa na ning daiwan ing sulapo qñg gabun na.
Yñyang ati la pa reng Amercanu qñg Clark ampong Subic, mebauas ya uari dagul ing Filipinas!? Ali ya!! Yng catutuan na nita, agguiang acaquit meng sula-sulapo ing uatauat na ning America quilub da reti, bandi na la pa mu rin ning Filipinas reng Clark ampong Subic. Yñyang meco la reng Amercanu qñg Clark ampong Subic, icua de uaring pebulldozer ing Clark ampong Subic bang dalan da la queng America!? Yng paquibat, ali mu naman. Yñyang mibalic la queng Filipinas reng capanibalan qñg Clark ampong Subic, meragul ya sucad ing Filipinas!? Pasibayu, ali mu rin ing paquibat.
Yñya pin mulala la reng Filipinu uling e da balu ing pamañiabian da. Bigla la pa mong mamaglucsu daya at pañgabugan reng salu da patie dimdam dang paintulutan lang macabanding gabun reng daiwan queng Filipinas. Taganang luse la reng Filipino Nationalist!
Yng metung pang sangcan da reng Filipinu, mañgapanaco la canu reng natural resources na ning Filipinas patie pepaburen lang micabandi reng daiwan queng Filipinas. Nung macañian, baquit dacal la reng illegal loggers queng Filipinas cabang baual lang micabandi reng daiwan queng Filipinas. Bala mu naman uari atnong cayapan reng anac putang Filipinu dapot y la reng palac mapanaco. Reng Filipinu pin reng mababalitang mapanaco queng Saudi Arabia. Atin cu ping abalitan a tindañgan canu quing aliuang bangsa a babaual da lang lulub reng Filipinu carin uling Filipinu la maralas reng araracap dang shop lifters. O ñgeni pin, cabalitan la reng congressmen ampong senators a memanacong millionis a salapi ibat careng pork barrel da at mepalaguan lang "Philippines' biggest crime syndicate". Caras pala queng capanacauan, e la mula-mulala reng Filipinu nune masiri la.
Yng Sala