Macapangasdan! Ating na pa lang "Korean Town" qng Angeles City. Ala ta mung camale-male a cabud nea mu limput ing Korean Town a y ni. Cabud daracal la reng tauo ibat Korea queng Pampanga. Minta la qng Pampanga ban magnegosyu at paritac-ditac, dinacal nong dinacal.
Nung apasyalan yu ne ing Korean Town a y ni, apansin yung pacapasquil la reng Hangul da careng balang tindangan da. Ala ca mang bitasang aquit a macasulat qng Capampangan. Macarine!!! Qng mabilug a Labuad Capampangan, atnang casaquit manaquit a pasquil a macasulat qng amanung Capampangan. Pulus Inglis ampong Tagalug ing acaquit mu, maquiabe la pa reng Korea. Qng sarili tamung gabun, e ta mu agagauang mamasquil qng amanung Capampangan. Mayap la pa reng Korea, cabud la mu dinayu queti, at nong casican lub ipasquil de ing carelang Hangul a alang capigaganacan nune capagmaragulan pa.
Tuturu de pang ing amanu da careng Capampangan cabang e de man yata buring panigaralan ing Amanung Sisuan. E la mu naman tutuqui qng caugaliang Capampangan nune y la pa ing manialacsac careng ugali da quecatamu.
Talagang macarine ing mangapaliari qng Labuad Capampangan. Y tamu pa ing lulual a menucluan qng sarili tamung gabun, y tamu pa ing alang acacarapat.
Mitalacad la pa mong marker post qng miatba na ning Friendship road a ating macasulat a "Welcome To Korean Town". Ay ba!!! Balumu ata binandi da ne ing Friendship road. Alang camarinayan, ninu uari ing sinabi carelang maliari lang mitalacad a sariling dang lugal qng Pampanga!?
Yng macasora pa canini, balamu na man matula la pa reng Capampangan qng maliliari. Ala lang camalayan a y'a pin na ini ing camatayan na ning Capampangan.
Miguising ca Capampangan! E ca paisaul!
Yng Sala