Caibat na ning mayatiat a anam a banua, dintang ne na naman ing aldo bang manalal a bayung pamuntuc ning Filipinas. Lima la reng misa-samsaman qñg pañgapamuntuc ning Filipinas at y la ri Vice President Jojo Binay, Mayor Rodrigo Duterte, Senator Grace Poe-Llamanzares, Secretary Mar Roxas, ampo y Senator Miriam Defensor-Santiago. Manimuna ya y Rody Duterte careng anggang tatauling duminggu da ring surveys anti da mo ring Pulse Asia, Social Weather Stations, ampong Laylo Research Strategies.
Alas dosi-quinsi na ning ugtu iñyang minta cu qñg piyalalan uling apansinan cu iñyang tauling alalan a maritac na la mu ring tauo neng atpanapun at anti ta pin ing disnan cu. Bina na lang maritac reng tauo uling alus maracal na la reng mecapanalal.
Catlu cu mu qñg pila inyang linub cu qñg cluster nung nu carin cu dapat mag-fill-up ballot. Quitnan na cu lagguiu ning macatutuc qñg pamanalal at linaue ne qñg carelang listajan, caibat dininan na na cung ballot a atnang cacaba. Caibat linucluc cu quetang metung a luclucan at carin tetacan deng lagguiu da reng buri cung iyalal. Cayari na nita, pepalub cu ne ing ballot qñg Vote Counting Machine (VCM) at ating linual a receipt ban canita asuguid cu nung tinggap na lang masalese ning VCM deng cacung inalal. Dininan da cung indelible ink queng cacung uanan a panuldu anting tanda a mecapanalal na cu. Sagli cu mung meyari, miguit-cumulang mung apulung minutus.
Mabilis, masalese, at alang casaquit-saquit ing merapat a alalan agguiang atneng capali ing aldo. Salamat na mu rugu.
Yng Sala