Aduang pulung banua na pala ing milabas iñyang memacbung ya ing Bunduc Pinatubu. Neng misan, balamu capilan pa mu. Oneng isipan mu na mu, ing biñgut a mibait canitang panaun a y ta, aduang pulung banua nea mu naman ñgeni, o baintauo o dalaga ne! Dapot atin na mu ring meñgaliñguan na, at pinayid na ne ning añgin qng carelang isipan ing acbung na ning Bunduc Pinatubu.
Yñyang bayu ya mamacbung ing Bunduc Pinatubu, mabilis yang susulung at sasanting ing cabiayan qng labuad Capampañgan at ati lu pa reng Amercanu canita qng Clark. Caretang panaun a re ta, babalacan na ne ning Robinson a manalacad yang mall na qng Sam Fernandu. Ala cami mang camale-male a atin cami palang casiping a volcano, at e mi ya man balu canita ing Bunduc Pinatubu. Talagang meñgabigla cami canita a atin palang Bunduc Pinatubu qng siping mi a mamitamit nang mamacbung. Yng masalang aslag na ning aldo, bigla yang mialilan a dalumdum a maqui ligalig, tacut, at calituan.
Y ta mu ring aldong y ta iñyang memacbung ya ing Bunduc Pinatubu, dacal la reng meñgalasac a bale at memaglaco. Balamu pin micaguierra na e! At linacad ya ing panaun a pasaquit neng pasaquit ing bie qng labuad Capampañgan. Dapot pauli na ning sicanan a lub ming Capampañgan cambe na ning quecaming cabiasnan at lugud mi qng Capampañgan, misan ya pang mibañgun ing bansang Capampañgan. At caibat da reng mapilang banuang casaquitan, migbalic ya ing diua at palac ya pang sinulung ing labuad Capampañgan at limpasan no pa reng mañgarayung balen a e man tinacman lasa.
Y tang anac a aduang pulung banua na ñgeni, bitasang alang ya pang camale-male qng malilyari canita, mangga man ñgeni, mapalyaring bali alu mu caya reng meñgapalyari canita. Uling reng pelalung matua na ñgeni at delanan da ing bie canita, ditac na mu ing mitatagan qng isip da. Uling lauen mu man ing macapadurut queca ñgeni, atin ca pang acaquit a abu a menibat qng Bunduc Pinatubo? Atin cang acaquit a bale a melasac ya bubong uling e ne agguiung saluan ing bayat na ning abung dinugpa caya? Atin ca pang acaquit a dalan a mayalipugpog? Atin ca pang acaquit a marangleng lupang abo? Talanga ca at lumaue qng matas a banua, atin ca pang acaquit a dalumdom? Angga na mu qng paganaca da carela ing milabas a bie uling ala nang bacas a mitagan ning Bunduc Pinatubu.
Yng Sala