Dacal la ariya reng Filipinu at iñyang misan pin apisabian de reng caclasi cu y Ninoy qng limang dalan a pesus. Yng salaping papil a culul papas dapot maquiquelañgan ya pañgapapas ing bayung limang dalan a pesus a papalual da ñgeni qng central bank. Masigla ya pañgapapas ing bayung limang dalan a pesus a balamu magculañgan ne salapi ing Filipinas bang magpalimbag a mapapas culul. Baquit ya mo culul papas ing limang dalan a pesus? Ala mu, pequilupa dea mu qng papas a malan nang Cory iñyang mica people power revolution a tegunan da ring maracal a mañgaindredus a Filipinu, magmulala carin uling ala lang camale-male qng malilyari. Dapot ing catutuan, coup d' etat ing taganang merapat.
Ñga ra, iñya canu mañgalupad ya ing Filipinas uling macasalumbaba ya y Ninoy quetang larauan na qng limang dalan a pesus, at saca ya pa canu malungcut. O'bat pin caya malungcut ya qng larauan na y Ninoy!? Mapalyaring uling isip-isipan na a e ya tinud quetang macasulat a "The Filipino is worth dying for." Mapalyaring magsisi ne nung baquit sucat ya pang minuli at peybaril cabud alang minuling mayap qng pañgamate na. Iñya malungcut ya y Ninoy quetang larauan na uling abalu na nang "The Filipino is NOT worth dying for."
Oi! E ne macasalumbaba at malungcut y Ninoy quetang larauan na qng bayung limang dalan a pesus dapot masaya ne't maili ya pa ñgeni. Baquit a'mo!? Uli casing mete nea mu naman y Cory at ebayan na ne y Ninoy quetang limang dalan a pesus a salaping papil. Atin neng cayabe ñgeni iñya masaya ne. Masaya la mu naman caya qng pañiaptan da ring anac da!? Masaquit pa mu rin ing bie qng Filipinas agguiang maili ne y Ninoy quetang larauan na.
Yng familia nang Ninoy ing mequinabang a maragul qng pañgamate na iñya meguing yang pamuntuc ning Filipinas y Cory. At pequinabangnan na mu namang Noynoy qng pamanagal nang pamuntuc ning Filipinas ing pañgamate nang inda na a y Cory, iñya y ya ñgeni ing macalucluc a pamuntuc ning Filipinas.
Yñya pin alilan na ne mung Ninoy queng "The Family is worth dying for." ing cayang casebian a "The Filipino is worth dying for."
Yng Sala