Mine cu Añgeles City nacatlu bang saling singcapoti at minuna cung linub qñg Don Juan Marketing. Buri que careng hardware ing Don Juan Marketing uling alus apaintun mu queni ing buri mung saluan. Bala mu y ni ing Go Thay Ho ampong Yap Bun King ning Sam Pernandu o Ace Hardware ning America. Anti na pa mu rin ning sadia a dacal la reng mañiali caniti at macayama lang lalauen reng pisasali dang gamit. Quitnan que ing metung careng mamisali nung atin lang singcapoti at asajan cung atin ing paquibat na oneng ala canu. Bala mu yata mipasabac cung maintun singcapoti canini. Yñya meco cu at meintun cu caretang casiping nang hardware oneng ala mu rin. Y tang metung a hardware a liban cu a malapit qñg Jollibee, atne rugung camulalan ing mamisali da, palague cu anac de reng maquibandi uling lupa yang layo at cauañgis yang Isic. Quitnan que nung atin lang pisasaling singcapoti. Maquibat ya ing anacputa qñg sabing Tagalug at bala mu e ya talagang biasang magCapampañgan. Inulit na pa ing cutang cu nung maintun cu canung singcapoti. O se wa ing paquibat cu at sinabi nang atin la canu at manic cu canu quetang babo. Mipatalañga cu quetang amanuan nang babo at magtaca uling e ne man lupang hardware ing queng babo ra oneng menic cu pa mu rin uling pota ati lu pin carin reng singcapoti da. Capanic cu qñg babo, quitnan que ing mamisali da carin nung atin lang singcapoti at sinabi na niti a ala canu, capoti canu ing atin da. Sabi cu na pin eh! Mesora cu at sinabi cu cayang e na cu aintindian nitang queng lalam. Pota galang capoti ing amanuan na a'na namang mequibat canacu. Sabi cu pin, "Bala na pin, capoti." a'cu naman.
Alus dirutan cu la ñgan reng anggang hardware qñg cabalenan na ning Añgeles City oneng ala cung apaintun a singcapoti. Ating sinabi careng metung a acasabi cung mamisali a ala na canung singcapoti ñgeni. Mapagal mu rin ing durut-durut qñg Añgeles City lalu na atna pa mong capali iñya minuli na cu mu.
Yñyang pauli na cu at quinuldas quing Balibagu, ating hardware a malapit qñg Astro Park at carin na cu man meñgutang nung atin lang singcapoti. Putanaida ra! Atnong caracal carin at agguiang metung man rugu carela alang maquibalu nung nanu ya ing singcapoti. At queta mu ring oras a y ta, abalu cung e la Capampañgan reng mamisali carin. Maracal-a-dacal, Bisaya la reng mamisali carin uli na ning gege ra patie magtagalug la, at atnong pañgachura casi. Ababalu cung agad nung Bisaya la reng animal a casabi cu, nung uari "You see one, you've seen them all!" Milupa-lupa la mung barriotic! Aintidian da cu agguiang paquisabian cu lang Capampañgan oneng atnong camulalan deng anacputang Bisayang a re ta uling e de pa mu rin balu nung nanu ya ing singcapoti agguiang pecaisplica cu neng masalese nung nanu ya y ta at nung nu carin ya gagamitan.
Abalu cu na ñgeni a patie Tañgalug ya ing casabi mu, bitasang mulala ya. Guinu cu naman! Sana mañgagisan na la reng animal a Tañgalug qñg Labuad Capampañgan.
Meyari ya ing aldo a ala cung asaling singcapoti.
Yng Sala