E na calupa ning dati, patie tinuclu ne ing bulan na ning September, magmula na lang daramdaman reng papacbung. Oneng ñgening banuang y ni, bina lang menayimic reng bulan na ning ber agguiang pang malapit nang magpascu ampong magbayung banua. Uling dati-rati, paratang ya pa mu ing bulan na ning September, e na patugut ing acbuñgan da ring papacbung.
Nung yacu ing cutnan nung nanu ing sangcan pauli na niti. Tanda na na y ti ning binang casaquitan na ning bie qng Filipinas. Mañgamal ñgan ing pañialuan, malati mu ing sueldu, caibat ditac la mu reng ating obra. Nung atin la mang obra, re ta mung amanuan dang contractual dapot atin mu rin namang ali. Nanu pa cayang mitagan queca nung silaban mo reng salapi mu careng papacbung, reng salaping e na managgui man ban pañialing canan qng aldoldo!?
At mapalyari mu ring dacal na la reng medala careng papacbung oneng balu ta namang mañgasias la buntuc reng Filipinu pauli ning camulalan da. Agguiang macananu mo pang ibaual, sulung da pa mu ring salangsañgan ing utus nung atin la mu ring salaping pañialing papacbung. Masaquit casing ibaual ing masaya!
Palague cu, ring paratang mu ring pascu ampong bayung banua ñgeni, matayimic la nung e la man rugu malungcut. Dacal pa cayang magtau queng pascu? Mapalyari, o y ta namung mañgan cang tinape ampong nanu mang ainum. Nung mamasyal ca careng supermarket, apansinan mu ring ditac na la mu reng mañiali. Atin mu ring palagad-lagad a cumpaniang mamie groceries careng magobra da at aquit mu na la mung diriria reng aliua a pacalaue careng daralan dang groceries cabang yuyuli da carela.
Mapuyat cu pa caya queng bayung banua? Mapalyaring e cu mipatudtud bayu magcapitañgan ning beñgi uling mapalyaring atin pang acbuñgan ing marapat at ulan cu nang sagli mu ing acbuñgan. At nung ala nang marapat a acbuñgan quening paratang a bayung banua, ñgeni pa mu e na cu magtaca.
Yng Sala