Nanu mo ing buri nang sabian ing Bale Herencia? Balu yu ne nung nanu ya buring sabian in Bale. Ing namang Herencia, menibat ya qng amanung Castila a mangabaldugang Mana. Quing amanung Inglis, mangabaldugan yang Legacy, Inherit, o Tradition. Quing malaguang salita, amana yang bale o Bale Mana.
Reng Baleng Mana bale lang matua a mitalacad inyang panaun da pa reng Castila. Balu mung balu uling atin lang aniung pamibalebaleng Castila. Nanan ta la pa reng baleng matua a reni? Ot lilingapan tala pa? Obat e ta na la mu lasacan ban mitalacad a bayung bale. Aguiang pang luma no retang bale a reta, maulaga la pa mu rin e mu itang uling ibat la caring nunu tamu uling magsilbi lang taid tamu qng milabas a panaun a malyari tamung apagmaragul ngeni ampon bucas.
Mengari ya mu naman ing pamaniulat Capampangan a tiru da ring Castila caring nunu tamu at pepamana da quecatamu, cailangan yang lingapan at pacamalan ban canita e ta mu acalinguan a inyang panaun a ita, ita mung Capampangan ing pecamasaplala, uli na niti, maliari tamung apagmaragul careng aliua ing pangacapampangan tamu at e mabating ing dangal tamu. Uli na ini, aguiu tamung lumacad at salubung caring aliua a macayatna.
Quing casulungsungan, pisasabian da reng aliua nung sanu ing tuquian qng pamaniulat Capampangan. Calubcuban nea mung pisasabian ini at ala yang parasan. Ninu uari ila ban dang ayalilan ing pamaniulat Capampangan? Ninu uari ila ban dang cabud da na mu lasacan ing Baleng Mana? Ninu uari ila ban dang e pagmasabalan ing milabas a panaun?
Qng casalese na ampong casanting ing pamaniulat Capampangan cabira-bira tataguinan yu. Ing daraptan yu macasumbagal qng pamniulung ning Capampangan. Inya mauauala ne ing dangal ning Capampangan uling lalasacan yu ing dangal ning milabas. Mayap pa, sumaup na cayu mu qng icasaplala ning Amanung Sisuan.
E ta mu dapat manaya nung sanu ing dapat tuquian uling maluat nang atin tamung dapat tuquian diquil qng pamaniulat Capampangan. Maliari mu ne, e yu na sa guguluan in masalese, ara pin deng Amercanu, "Don't fix something that is not broken". Isundu tamu mu ing pamaniulat Capampangan a tiru da quecatamu ring Castila uling ini ing dapat ta mung tuquian at ala nang aliua pa, ala tamung dapat panayan.
Yng Sala