Inyang panaun da reng Amercanu qng Clark, balamu miras na ca mu naman qng America calub mu carin. Yng dicut e mu aquit tutubung matas, ing traffic pamintuan da, ala cang aquit cabud na mu dadalaquit careng dalan, reng bale atnong pangalinis. Ausan dea ping "Little America" ing Clark canita.
Ngening ala no reng Amercanu at manucnangan na la ring familia da reng sundalus na ning Philippine Air Force carin, ing cabaligtaran na ing malilyari. Aquit mo reng sadia dang bale reng Amercanu carin a manuling na la uling paburen da la mu reng manucnangan carin, quiquita la rugu qng lumut. Aquit mu la mu rin reng pacasable dang malan careng sablayan qng lual bale. Culang na mu naman ing mitalacad lang culungan manuc ampong cural babi. Miglupa ya rugung "squatter area" ing dane na ning Clark carin.
Dacal la mu rin reng mamasadang jeep carin a sundalus lang Air Force. Nung e mo pa iquit magmaneu ren, e da pamintuan ing traffic.
Atin la mu na mang pasari qng pangaracal da reng Tagalug qng Pampanga uling ala no mang balu ren nune managalug mu. Inya pin masanting na ing ilaco da ne ing Philippine Air Force qng Clark cambe da na mu naman reng aliuang Philippine Air Force base queng Pampanga. Nanu uari ing apala ta mu qng Philippine Air Force, cabud ya mu Air ala ne mang Force. Panaun la pang Apon reng eroplanu da. Ing Aermacchi S-211F na mu rugu ing mitatagang eroplanu da a masanting-santing. Oneng nung paquilaban me y ning eroplanung y ni careng aliuang bayung eroplanu ngeni, micacunu ya pa ing pilotu nung tiran ne pa uling masayang ya mu in sidewider missile na.
Mayap pa ing manatili na la mu pin reng Amercanu qng Clark capamilatan na ning Visiting Forces Agreement (VFA) ban canita subli ya qng leguan na ing Clark. Casanting na patie migbalic na la reng Amercanu qng Clark, cayan na naman ing cabiayan ampong manaquit ta na namang mangasanting a eroplanu calupa da reng F-16 Falcon, F-15 Eagle, F-22 Raptop ampong miayaliua pa.
Yng Sala