Mapali ya ing abac na ning aldo ning Lunis a casing pali na ning marapat a alalan ning banuang 2010. Yting aldong y ti, mamili na namang bayung pamuntuc ning Filipinas, bayung caduang pamuntuc, at cambe da ring bayung maguing senators, congressman, governors ampong caduang governors, mayors , at reng councilors.
Inyang mapilan a duminggu bayu ing alalan, samal la ngan reng puliticu qng pamangampania qng dalan, qng radiu, qng TV, at careng pamie rang papil.
Damdaman mu la reng carelang sound systems a atnang pangasican a macasaque careng saquen da at dudurut careng balang barriu ban mangampania. Atin la ngan pa mong jingles a meangu careng dalit a sicat a maralas mararamdam careng radiu. E me acuang aintidian ing alben mu qng TV patie mipatulid la qng bale mu re ti. Guisingan da ca mu naman patie casulungsungan mung matudtud a maniaman. Alub mu namung pamasibasan mu la reng diablus. Alus mangampania la qng Amanung Sisuan at macabaldug mu naman caniti reng carelang jingles. O se map na mu ing Amanung Sisuan ing gagamitan ra pablasang atin lang cailangan queca reng sugapan.
Quen namang TV, alus patalastas da reng tatagal pamuntuc reng ayalben mu, paulit-ulit, macalangi.
Maracal no reng tauo inyang alas ochu ning abac careng pipagaralan nung nu carin marapat ing pamanalal. Malisuas la qng pamanintun careng carelang laguiu a pacapasquil careng dalig. Atiu la carin reng camera man ning CLTV 36 ban mamalita qng magaganap a alalan. Atin mapilan a magcasaquit maintun qng carelang laguiu, macananu naman rugu, pacapasquil la reng aliuang laguiu qng macasalicut a dane na ning building. Icua mu neng dirutan ing mabilug a pipagaralan, atiu ya pala qng masulud a gulut ning pipagaralan macapasquil reng laguiu, acua mu nang mitauli qng pila a pacaba nang pacaba.
Dapat balu me ing precint number mu inyang pepa-register ca ban meng abalung agad nung nu carin ya panintunan ing laguiu mu, nung ali, libutan me ing mabilug a pipagaralan ban meng apaintun ing laguiu mu. Caibat meng apaintun ing laguiu mu, tandanan me o isulat me ing number mu, caibat pumila na ca.
Pangaras ning alas diez, bina nong meracal reng tauo at talagang macaba ne ing pila. Panamdaman mu ing pali ning aldo at mababasa ne ing malan qng pauas. Masali la reng pisasali rang inuman.
Patie miras na ca qng la mesa na ning verifyer, cutnan ne ing laguiu mu o ibie me y tang number mu ban neng aquit agad, caibat neng apaintun ing laguiu mu, paluban da ca qng silid ban carin manenaya, tia lima la reng lulub qng silid, at tia lima la mu naman reng lulual qng silid. Paunan da nong lulub reng senior citizen.
Caibat mung menenaya qng silid, paluban da na ca na naman quetang metung a silid ban carin de paintunan y tang papil a silutanan mu canitang pepa-register ca. Cunan de canita y tang papil a y ta at isulat me ing catandanan quing gulut na, caibat icana mea mu rin ing thumb mark mu qng lele ning catandanan mu. Caibat na nita, denan da cang cartun a macaba a maqui cabang aduang pie. Quening cartun a y ni carin la macasulat reng iyalal mu. Maintun na cang luclucan mu canita ban carin mu ne den tanda reng laguiu da reng iyalal mu. Atin nang tambing pentel pen carin a gamitan mu ban den tanda y tang cartun. Caibat micanang tanda careng iyalal mu, ibalut me ing cartun quetang folder ban canita e de aquit nung ninu reng inalal. Cabang macabalut ya quetang folder, ipalub mu neng baguia-bagui quetang counting machine. Patie abalu na na ning counting machine a ating lulub a cartun, igutan na neng pacacalale ing cartun mu. Caibat neng pengan ning counting machine ing cartun mu, den da na ca canitang indelible ink qng taliri mung panuldu.
Culul lang matuling reng counting machine at atin lang sariling batirya. Pacacunsi la ring counting machine. Ating macasulat a COMELEC queng carelang cunsi.
Alas onci na inyang meyari, alus atlung oras ing lacad na ning pamanalal. Dimdam cu careng aliua a sinagli la mung menalal reng quing aliuang balen uli casing ditac la mu reng bobotu carin.
Masalese nemang merapat y ting alalan ning May 10, 2010 queti Pampanga. Iquit cung mapamintu la ring cabalen tamu at ditac la mu reng mepali buntuc. Yayta, pacayugse la qng gabun reng papil a pamie ra, queni ta mu magculang. Capampangan cu, pagmaragul cu. Cabalen ta ya sana ing lumput a bayung pamuntuc ning Filipinas. Luid ya ing Capampangan!
Yng Sala