Nung pilupa la ring ciudad na ning San Fernandu ampong Angeles, ala ya rugung panama ing Angeles. Quing San Fernandu, atnang calinis ampong canayun. Pamintuan da reng memalen carin reng utus na ning ciudad da. Aquit mu la reng tauo carin a pamintuan da ing batas ning traffic uling dadalan la careng dapat a dalaquitan. Ala na lu mu naman reng mamisali careng sidewalk a pacasalabat. Atnong casanting acaquit tataluntun careng dalaquitan a anti mong panas a tuqui-tuqui la. Aru! Carayu na pin ning Angeles nung nu carin maquisalitan la careng saquen reng tauo a dadalaquit a balamu babagua lang cabud na mu susulput.
Ala ca mu namang aquit a dinat a sulasulapo uling atna ping calinis. Tambing cang manaquit piugsayan dinat careng balang suluc. Ngeni, nung ati ca Angeles caibat atin cang tatalnang balat ning candy, balamu mangapatacla cang e mu balu nung nu carin ca marap uling ala cang aquit a piugsayan. Inya mayap pang ibulsa mu nea mu at carin qng bale mu nea mu ilele.
Aliua ya talaga nung mayap ya ing manungculan ning balen uling cuculdas ing cayapan na careng memalen. Bina yang dacal a cailangan ing Capampangan calupa da reng manungculan a anti carela. Inya quing tutuquing alalan, pilinan ta la reng mayap a ating panamdam macabalen ba yang lacuas sumulung ing Capampangan ampong ban masaguip ya ing Amanung Sisuan.
Ing e mu masanting a aquit mu qng Sam Fernandu, re tang pacasulat a pasquil careng dalan uling pacasulat la quing digpa ning alting Tagalug. Aydana! Casaquit da qng panimanman de ta. Acua mu nang mangaplas mata qng cacalaue careta. Dapat da lang isulat re ta qng Capampangan ampong English mu at ala na aliua pa. Nung ninu man ing sinulat caretang macapangaplas matang pasquil, rugo ne, biasa ca sang dumine uling alang camarinayan ing gueua mu. Mayap pa, pamaglaco mu no re ta uling pota, y ca ing ing iyugse da qng aliuang labuad. Pota cabira, macapangan na ca mung lasun a e mu man amalayan.
Yng Sala