Y caming Capampañgan reng mayupaya qng politics manibat pa qng ibat at pasibayu mi na namang pepaquit y ni pauli na ning pamañiambut nang Benigno Simeon "Noynoy" Cojuangco Aquino III bilang pamuntuc na ning Filipas.
Caibat nang meangu bie y inda na a y Maria Corazón "Cory" Sumulong Cojuangco Aquino iñyang mumunang aldo na ning Agostu ning banuang 2009, dacal careng memalen a añiauaran da cang Noynoy ing tagal yang pamuntuc na ning Filipinas. E ya bisang tagal canita y Noynoy iñyang mumuna dapot penusigan na la mu rin reng tauo qng bandang tauli at pepesiag nang tagal ya mu ring pamuntuc na ning Filipinas. Pauli na ning politics qng Filipinas, dacal la papalual a casiran cang Noynoy dapot alampasan na ngan y ti caibat na ning alalan ning May 10, 2010 uling y ya ing lalto manimuna careng tatagal pamuntuc ning Filipinas. Maragul ing lamang na careng calaban nang tatagal at ala neng casambut talaga. At ngening aldong y ti, y ya na pin ing limput a miñiambut bilang tutuquing pamuntuc na ning Filipinas at canlasan ne ing cayang cabalen a y María Gloria Macaraeg Macapagal-Arroyo.
Oreni reng Capampañgan a meguing pamuntuc na ning Filipinas:
1. Diosdado "Dadung" Pangan Macapagal
Casiam a Pamuntuc manibat December 30, 1961 anggang
December 30, 1965
2. Maria Corazón "Cory" Sumulong Cojuangco Aquino
Calabingmetung manibat February 25, 1986 anggang June 30,
1992
3. María Gloria "GMA" Macaraeg Macapagal-Arroyo
Calabingapat manibat January 20, 2001 anggang June 30, 2010
4. Benigno Simeon "Noynoy" Cojuangco Aquino III
Calabinglima manibat June 30, 2010 mangga qng 2016
Nung apansinan yu, mitata lang ibat Pampanga ri "Dadung" ampo y "GMA", caibat naman, miyinda lang ibat qng Tarlac ri "Cory" ampong "Noynoy". At nung apansinan yu mu naman, mililiuas la mu reng Capampañgan qng Pampanga ampong Tarlac qng pangapamuntuc na ning Filipinas. Ing buri nang sabian caya canian, Capampañgan yang ibat qng Pampanga ing cumanlas cang "Noynoy"!? Ninu naman caya y ta!? Ooh! "Baby", "Baby", "Baby" Ooh!...nga na ping Justin Bieber quetang dalit na! At catataulian, meguin la pa mung Caduang Pamuntuc ning Filipinas reng mitatang a "Dadung" ampong "GMA" bayu la meguing Pamuntuc ning Filipinas cabang e no man dinalan qng panagacaduang pamuntuc ning Filipinas reng miyindang "Cory" at "Noynoy".
Dacal na la mu naman reng Capampañgan a tinalan careng mangacatas a catungculan ning Filipinas calupa na mo ning Pamuntuc Ning Senate, Pamuntuc Ning Catalauran, at miyaliua pa.
Capampañgan, reng guinu ning politics! Alang macasambut, alang macasaul, at alang macaraig! Queganagana durucu caya...Bisaya, Tagalug, Ilucanu...macasiclaud caya.
Yng Sala