E da ca ta mu amulang, y ca tamung Capampangan! Ynyang tatagal yang governor y Amung Ed, inisip tamu a subucan taya y ning pari at lauen tamu nung atin ya ping maragul a arapat qng pamagbayu qng Pampanga at qng pangasaplala ning Capampangan. Malagua ya mung linabas ing atlung banua at meyatulan ne y Amung Ed, "Mesambut ya!" Timbacan ne rugung Lilia "Baby" Pineda.
Malagua ya mu naman ing sangcan obat rugu e ne limput y Amung Ed, uling ala ne man talagang arapat a mayap qng Capampangan. Manibat inyang linucluc yang governor ning Pampanga, pane na mung quarry ing pisasabian. Megumpisa qng quarry, meyari qng quarry. Cabud na mu uari qng quarry ya mabibie ing Capampangan!? O ngening dacal ya penaquitan qng quarry ing capitolyu, atin uaring migbayu canita!? E! Malaut neng masalapi ing labuad ning Capampangan manibat pa canitang bayu de lelengan ing La Pampanga reng Casitila. Inya pin ing Pampanga ing pecamumunang provincia queng Filipinas canita uling ing labuad ning Capampangan mu canita ing malyaring talacad a provincia ning Filipinas anti careng provincia qng España. A ua! Cailangan yang maragul ing salapi qng aldodong pamilacad na ning provincia, dapot sadia neng maracal a salapi, aliua mu y ni ing cailangan na ning Capampangan nune cailangan ta ya mu namang saguipan ing culturang Capampangan lacuas na ing mamamateng Amanung Sisuan. Nga na pin nitang quesabian qng biblia, "E ya mu qng tinape mabibie ing tauo."
Bucud pa qng quarry, balamu liban na nea mu naman ing pamag-artista uling balamu showbiz mu ing pamañiambut na, pagamit careng bisang gumamit.
Balu ta mung bisa yang sumaup y Amung Ed oneng e ya mu pin macatud ing paralan a gueua na. E mu sana singil qng quarry ampong showbiz ing erapan na. Malyari na ca mang sumaup qng malda a alang manasaquit lalu na re tang acalaban na qng alalan. Ing pamañiuyu careng sasacupan, dapat pante-pante mu, dapat paqui-intidian mu la, dapat miabe-abe, y tamu ñgan, alang malalacuan.
Dapat sana, titucan nea mu namang Amung Ed ing pamañiaguip qng Amanung Sisuan uling y ni ing caladua na ning Capampangan.
Mayap pa naman rugu y Senator Manuel "Lito" Mercado Lapid, agguiang macananu, atin yang ararapat inyang y ya pa ing governor na ning Pampanga. Ambusqui macananu, sisican la lub reng Capampangan lacuas na inyang memacbung ya ing bunduc Pinatubu. Neng misan pin naman, e na maulaga nung tictac ca cabiasnan nung ing queng isip mu ing pamañiaup careng Cabalen mu. At inyang meguin neng senator, licuan na na ing pamag-artista at erapan na na ing panga-senator na. Cabaligtaran na ne mang Amung Ed, obat nung capilan ya meguing politician, carin ne man meguing showbiz.
Ynya, uyta! E ca malyari careng Capampangan nung e me pagmasabalan ing Capampangan. Yng caburian da reng tune Capampangan ing marapat. Sibucan ta ya y Amung Ed, e ya milayari, inya pinili ta ya y Lilia "Baby" Pineda at y ya naman ing subucan tamu ngeni. Qng palague cu, maragul ya ing pagasa tamu qng pamañiaguip qng Amanung Sisuan cang Indang "Baby".
Yng Sala