Tauling aldo na ning bulan ning Juniu ning banuang 2010, meyari ne ing pamanungculan na ning quecatamung pacamalan a Pamuntuc Gloria Macapagal-Arroyu qng Filipinas at ñgeni mu ring aldong y ti magsimula ne man ing pamanungculan nang Pamuntuc Benigno "Noynoy" Aquino III. Quing malaguang salita, catuclu na ning mumunang aldo ning Julyu ning banuang 2010, y Pamuntuc Benigno "Noynoy" Aquino III na ing tatalañgan ta mung bayung pamuntuc ning Filipinas.
Nung ayalben ye y tang pamañiumpa nang NoyNoy qng Quirino Grandstand qng television, simpli ya mung milabas agpang qng panaquit cu. Sasabian da ring qng TV a miras la canung capitnang sangiuta reng tinagun qng meganap a pamañiumpa dapot qng panaquit, mapilan la mung libu reng tinagun. Talaga naman reng mamalita queng Filipinas, pane mipapalalu ing pañiabian da ban mung maguing masali careng manalbe ing babalita da. Meñgari mo patie atin sinabing mecaramdam lang metung a acbung quetang meganap a pamañiumpa, tambing da na mang ibalita reng queng TV a ating apulung acbung a merandam. Pane rang daragdagan arina ing balita, macapal ya oneng ditac ya mu laman.
Pati rugu ing pañgimut nang Noynoy ampon GMA, miririnan aliuang cabaldugan. Anti mo ni tang buri neng ibie ing gamat nang Noynoy cang Pamuntuc Gloria Macapagal-Arroyu ban sopan neng culdas or tuclu quetang pitucluanan na. Tambing dang sasabian a e ya bisang pasaup y GMA cang Noynoy at e ya canu mamansin. Nung pacalauen yeng masalese ing pialben da, aquit mu naman talagang e na balung GMA a buri ne palang sopan Noynoy quetang pamañguldas na at pamanuclu quetang tucluanan da. Bala da naman deng aliua, buri neng galamatan Noynoy y GMA quetang pañgimut na. Reng tauo Filipinas talaga, ala lang balung isipan a masalese.
Yng pang machurang merapat qng pamañiumpa nang Noynoy, obat rugu Tagalug ing guinamit nang amanu qng cayang speech nung nu carin dapat English ing guinamit na. Macarine ing depat nang y ni careng Capampañgan, Ilucanu, Bisaya, Cebuanu, at aliua pa. Nanu uari ing buri nang palto canini? Ing e ya biasang mañgamanu qng Englesh!? O buri nang palto a Tagalista ya ing digpa ning alti!? Bilang pamuntuc ning Filipinas, e mu malyaring gauang sangcan ing e ca biasang mañgamanu qng English at lacuas nang e ca malyaring maguing Tagalista. Uling nung Tagalista ya y Noynoy, binang e ya maglambat qng luclucan na qng Malacañiang.
Yng pang maroc qng speech na, ot pamanira mu qng milabas a pamanungculan ing masasambitla. Mañgacu ya pang labanan na canu ing cacoriatan dapot atin sadiang pamuntuc qng siping na a meculang pauli na ning meyatulan ya qng pamañgoriat. Nung tututuanan na mu ing sasabian na, dacal no sana reng meñgabating a pacalucluc qng gulut na.
Masaquit ya cabilian at arapan careng daratang a panaun qng pamanungculan nang Noynoy uling agpang qng panaquit da reng mangatenacan, ala yang caguiuan ban talacad at manungculan bilang pamuntuc ning bangsa. Oneng ing canacu mu, e ta ya pa mu atulan rugu. Mapalyaring ala yang arapat a mañgayap inyang congressman ya pa at senator, dapot male ta mu, lunto ya pa lang magaling a pamuntuc ning bangsa. Nung lunto ya mang mainang pamuntuc y Noynoy, e ta mu cacaliñguan a bilang memalen, atin ta mung acarapat qng pamibiebie ning bangsa.
Yng pang metung talagang machura careng ugali da reng tauo Filipinas, ot pamansagan deng mangachurang laguiu ing pamuntuc ning Filipinas. Ua, e ya masanting a bangsa ing Filipinas dapot e ya dapat pamansagan machura ing pamuntuc na ni ti. Ybie naman sana ing cagalangan queng tatalan qng pañgapamuntuc ning bangsa uling macañian mu naman ing dapat careng aliua pang bangsa. Yng sadiang pamuntuc ning America a y George W. Bush Jr., agguiang dacal la reng e maquiburi caya, e de mu naman dapat pamansagan a miayaliuang mañgachurang laguiu. Calupa na ning ñgeni cang Noynoy, ot ausan de rugung P.Noy!? Camulalan da talaga reng tauo qng Filipinas! E da rugu balu ing catayang "pinoy", cataya yang lelangan da reng Amercanu ban pandacuracan do pañgatauo reng tauo qng Filipinas, racial slur ing aus da reng qng albugan caniti. Yng metung pa, e no merine reng tauo qng Filipinas at ausan deng "abnoy" ing pamuntuc ning bangsa. Yng "abnoy", menibat ya qng catayang English a abnormal. Nung sana ing buri na sabian ning "abnoy", Aquino, Benigno "Noynoy" ya. O, Aquino-Binay-No-Or-Yes ... ala mu, ala cung ayisip a masanting ibie careng letrang N, O, Y.
Yng pecamasanting a ayalben cu quetang pamañiumpang meganap inyang memun ne at sinaludu ya ing matas careng sundalus cang GMA. Mamamun no reng sundalus qng carelang Commander In Chief at aquit mu qng lupa nang GMA a maluncut ya dapot matula ya.
Yng Sala