Neng misan pala, agad mung abalu nung nanu ya pañgatauo ing metung a tauo agpang mu qñg obra na. Maracal nang banua ing milabas iñyang acapagsalita que ing bapa cu a sadiang megobrang civil engineer careng constructions qñg Middle East. Selita na canacu ing bieng delanan na qñg Saudi Arabia ampo reng tauong acapagobra na carin. Atin mu rin canung Apon a maquipagobra queng Saudi Arabia a'na. Mebigla cu queng sinabi nang y ni uling e cu balung agguiang palang deng tauong menibat careng amanuan dang first world countries, maquipagsapalaran la mu naman queng labuad a atnang capali ampong mabuañgin. Uling agpang queng dimut cu mung balu queng Middle East, deng mung tauong alang acacarapat queng bie ra reng maquipagsapalaran carin anti da mo reng Filipinu, Indunisian, Indian, cambe da pa reng aliuang tauo a menibant careng bangsang ausan dang third world countries. Yñya mebigla cu queng sinabi nang bapa cu a atin mu rin canung Apon a maquipagobra queng Saudi Arabia at uling iquit na ing pañgabigla cu, agad nang lininauan canacu a e la anti da reng aliuang maquipagobra carin deng Apon. Deng canung Apon a maquipagobra carin, alus consultant la, ampong nanu pang mañgacatas a catungculan ing tatalnan da.
Canita cu aisip a atin mu rin palang tauo a menibat careng first world countries a maquipagobra queng Middle East oneng mañgacatas a catungculan ing tatalnan da. E ra rugu calupa careng Filipinu a maquipagobra queng Middle East a tatalan careng obrang e da buring luban deng tauong menibat queng Japan, USA, UK, ampong Europeans.
Qñg malaguang salita agad me ping abalu nung nu carin ya menibat ing metung a tauo agpang mu qñg obra na. Patie consultant ya ing obra na ning metung a tauo queng Middle East, maracal-a-dacal, Apon ya o caya Amercanu ya. Ñgeni, patie rugu ing metung a tauo quing Middle East metung ya mung maid, prostitute, peon, mamasura, at nanu-nanu pang obrang mañgabayat, maracal-dacal, Filipinu ya.
Macapagmulala uling anti mu rin cañian ing malillari queng Filipinas nung e yu apapansinan. Agad mung abalu nung Bisaya ya, Tagalug ya, Ilucanu ya, Pangalatuk ya, o Muslim ya agpang mu qñg obra na.
Bisaya! Queraclan, prostitute la ampong maid.
Tagalug! Maralas, driver la ampong waiter.
Ilucanu ampong Pangalatuk! E la mu mising culul dapot maralas lulub lang security guard.
Muslim! Aru, mamisaling pirated CDs at nanu pang fake a mallari dang apisali.
Capampañgan! Oren deng regular boss, honchos, ampong businessmen.
Ala cung mamarocan careng nanu mang mesambitlang obra. Papasiag cu mu a atin la palang acacaugaliang obra reng balang ethnic nations magcasaquit la man qñg bie ra o ali.
Yng Sala