Quing danup cu, mipapulai cu quilub ning Jollibee qñg Balibagu at meñgan carin. E cu naman capad ing mamañgan quing Jollibee oneng masanting yang pipañganan uling agguiang macananu, macasali cang canan a mura at malinis. Mañyaman mu naman ing mamañgan quilub ning Jollibee uling marimla quilub na niti. Anti na pa mu rin ning dati, pacasabian mu lang Capampañgan ding service crew, maquibat no mang tagalug ding buguc. At apansinan cu mu naman a bala mu dacal na careng service crew reng dayu na. Yng buri na palang sabian niti a binang dacal la reng daranup careng aliuang provincia iñya darayu la pa mu Pampanga bang mantun obra agguiang mag service crew mu rugu careng ausan dang fast food restaurant anti da mo reng Jollibee ampong McDonald's.
Cabang macalucluc cu at mamañgan quilub ning Jollibee, atin cung abatiaoan a lalaqui a magdili-dili at atin yang tatalnan a tablet computer. Matua-tua ne ing lalaqui a palague cu maqui banua neng limang pulu anggang anam a pulu. Malati ya mu ing tatalnan nang tablet computer a palague cu CD-R King ya mu ing cayang tatac. E cu mu naman capad ing mañiali qñg CD-R King uling atnong pañgadbud reng cayang pisasali. Balu cu uling macatapilan na cung mecasubuc careng pisasali da at agad lang masisira iñya agad cung metabang a lub bang mañiali qñg CD-R King. Anti mu rin, dacal na cu dimdam careng aliua a e la micacasuelu careng asasali da qñg CD-R King uling talacasira la reng pisasali da. Mura ing pañialuan qng CD-R King oneng re-branded la at mañgadbud, nanu pa uari ing asajan mu careng bagueng atnang camura.
Pañgabaguia, ating service crew a linapit quetang lalaquing magdili-dili, at dinuang ne ning service crew ing shanghai roll a seli na ning lalaqui. Caibat, atin yang agad dinuang a malating papil ing lalaqui quetang service crew at pepabasa ne y ti. Dapot e cu daramdaman ing sasabian da, iquit queng tinañgu ing service crew caibat neng binasa ing macasulat qñg malating papil at saca ne meco. Queng isip cu, atin ya pang papaorder a aliua ing lalaqui. Neng cai casi qñg Jollibee, ating magcusang lalapit a service crew queca at alocan na ca pang saling aliua at y la na mu ring ume qñg service counter bang sali.
Caibat na ning mapilang minutus a linabas at malapit cu nea mung ayari ing cacanan cung humburger, ating linapit a security guard quetang lalaquing magdili-dili. Atin yang dinuang a aduang bague ing security guard quetang lalaqui. Dinuang no ning security guard reng panulu a macasuput plastic a malati ning Mercury Drugstore, ampo pa y tang malating papil a binie na nandin ning lalaqui quetang service crew. Ñgeni cu aisip a inutus ne pala nitang lalaqui ing service crew bang lumual at saling panulu quetang Mercury Drugstore a tulid ning Jollibee.
Taxiapo! Ninu caya ing palague na y ya nitang lalaquing magdili-dili!? A cabud na na la mung mallaring utusan reng magobra quing Jollibee o sanu pa mang pipañganan!? Palague na yata uling matua ne at malyari nang daptan y ta. O uling atin yang tablet computer a pitimid-timid at paquiramdam na atna neng caulagang tauo at malyaring yang mag-ari-ari quilub da reng pipañganan!? E na naman mallaring isangcan a uling matua ne uling tacnaidu na, mausta namang atneng casican, mamañgan yang shanghai rolls a atnang cataba, macapagtablet computer ya pa, at lalung-lalu na, milulub yang qñg Jollibee a alang casaup at mamañgan canan a macayataki pusu.
Yng Sala