Iñyang Clark International Airport ya pa ing laguiu na canita, e que buring alilan de laguiu oneng mialilan ya. Millari na ing merapat! At ñgening Diosdado Macapagal International Airport ne, balac de na namang alilan ing laguiu na, uyta mu pin, ibalic de quetang dati nang laguiu a Clark International Airport.
A'da mo, iñya canu buri deng ibalic qñg Clark International Airport ing laguiu ning airport uling palac de canung quilala ing laguiung Clark alus mabilug a yatu lalu na careng Amercanu, at ing aviation code nang CRK a parati dang gagamitan deng pasulapong eroplanu. Mapallaring tutu ing sasabian da oneng mallari ne uaring gamitan sangcan y ta ba deng cabud na mu alilan ing laguiu ning pidugpan eroplanu o airport qñg Clark!? Maustang binang ali ing paquibat.
Ulata namang uling masucal ya lub ing macalucluc a pamuntuc ning bangsa cang congresswoman Gloria Macapagal Arroyo iñya buri de mong ibalic qñg dati nang laguiu ing Diosdado Macapagal International Airport (DMIA) a macapalaguiu cang ibpa na.
Ala ne mang arapat a mayap ing pamanaliling laguiu ning airport careng tauo o agguiang mang careng gagamit caniti. Cayalili na laguiu ning airport, manatili ya pa mu rin anti canita a alang migbayu nune ing laguiu mu. Nung macananu meng licuan, anti me mu rin canita dasan. Nung malati ya, malati ya pa mu rin. Qñg malaguang salita, alang mayap a pamagbayu a dapat icasulung na ning pamibie-bie na ning tauo o agguiang mang sanang icasanting na ning airport qñg pamaglacbe.
Macanian la talaga ugali reng Filipinu, atin lang ugaling cabud na mu manalili agguiang e man dapat. Gagamitan de ing pusu da quesa qñg utac da. E cu mamarocan ing pamaggamit qñg pusu nung nanung buri mung daptan qñg bie uling cadaque ne ning catauan ing pusu, dapot cailañgan ya mu namang gamitan ing utac. Neng misan pin, palac me pang dapat gamitan ing isip careng nanu mang buring mung daptan qñg bie mu.
Yng metung pang e cu buring depat da qñg Clark, y tang pemanalilan da la laguiu reng egana-ganang dalan carin. Ñga na pin nitang dalit da ring Guns n' Roses a maqui pamagat a Patience, "the street don't change, but maybe the name" a mañgabaldugang alang magbayu qñg dalan agguiang pang mialilan ya laguiu. Bigla la uaring salese reng dalan patie pemanalilan mu la laguiu, bigla la uaring dacal, salese uari ing cabiayan!? Pati y tang dalan a macapalaguiu qñg tanaman a tutubu carin, e dea mu rin pepatauaran rugu. Y ti pauli ning carelang filipino nationalism.
Anti ya caninni casi ing filipino nationalism:
Mumuna: Pamagbulag-Bulagan
Nung uari qñg amanung English, "Filipino nationalism is to turn blind eye." Patie dimdam da ne ing laguiung Filipino, bigla lang alang acaquit, agguiang palto mu ne carela ing catutuan qñg arapan da, e de buring tanggapan.
Cadua: Maguing Biñgi
Nung uari qñg amanung English, "Filipino nationalism is to turn deaf." Agguiang pang igulisac mu ne qñg adua rang balugbug, ala lang damdaman.
Catlu: Baual Misip
Nung uari qñg amanung English, "Filipino nationalism is not to think." Agguiang pang balu da nang e mayap ing sarili dang dapat o ing daraptan da ring aliua, agad da mong isangcan a daraptan da mu naman canu qñg aliuang bangsa. Sabague, nanu pa uari ing ayasajan mu careng Filipino a cautac bia. E da talaga agguiu ing misip, cabud ya mu mamintu nung nanung iyutus mu caya a anti mong bangque o zombies. Queraclan pin, e da man rugu balu nung nanung pañiaptan da e!
Ñgeni, ibalic de man qñg laguiung Clark International Airpot o ali ing DMIA, dapat mung ibalic da la reng sadia rang laguiu ring dalan quilub ning Clark. O nanu mo ñgening mica heart attack ya y Manuel Roxas a meguing pamuntuc mu naman canita ning Filipinas qñg Clark, dapat da ne uaring alilang M. A. Roxas Hi-Way ing Mitchell Hi-Way. Pepatalacad de pa rugung rebultu na carin. Caracal da mu naman reng meñgamateng Amercanu a sinaup canita quecatamu iñyang panaun da pa qñg Clark at lalu na iñyang WWII a dapat mu namang parañgalan. Caracal careng cabalen tamu a mequipagobra canita careng Amercanu qñg Clark ampong Subic, caracal da reng cabalen tamu a mamasa canita careng Amercanu careng business da.
Meguin na lang cadaque ning bie tamu reng Amercanu at anti mu rin y tamu carela. Y ti tutung milyari at e dapat ilaco pauli na mu ning filipino nationalism a macabulag, macabiñgi, at macayalang sariling isip.
Yng Sala