Quing maluat a panaun, mililiuas la mu reng Lazatin ampong Nepomuceno qng pangamayor ning Angeles City ampong pangacongressman ning mumunang district ning Pampanga. Ngening daratang a alalan ning 2010, ninu caya ing lumput a congressman? Balamu malagua ya mung paquibatan ing cutang a y ni, ale!? Oneng! "Ding e na bisa, Ding sinaua na, Queni ta na" nga na ping Ares Yuzon Yabut. Atin pin cayang malyari careting amanung simbitla na!? Aguia pa yatang sinaua na la reng tauo careng Lazatin ampong Nepomucenu, y la pa rin yata reng lumput bandang tauli. Ninu uari y Ares Yabut ban lumaban careng Lazatin ampong Nepumucenu qng daratang a alalan nung mabantug la reng laguiu da reng aduang tatalui nu carin ca man miras. Ot balamu pin atnang casaquit ing tagal ca laban careting adua a balamu sasalansang ca qng agus na ning mabilis a ilug.
Reng Nepomucenu rugu, balamu anti da ne mong bandi ing Angeles City. Carela ya ing palenqui, carela ya ing university, carela ya ing electricity, carela la reng subdivision, at pati rugu ing city hall; carela ya mu naman. Anta macananu ca pin ne!?
Nung atin mang mitagan qng Angeles City a e ra bandi reng Nepomucenu, caren nong Lazatin deta. Latac nea mu rugu ing mitagan cang Ares Yabut, ale!? Masaquit pin talaga. Agguiang mu sanang qng arapat a mayap ing laban nang Ares Yabut, oneng atin naman caya ing cutang!? Yng balita yata, ating tauo qng gulut nang Ares Yabut a bisang gumugul a maragul a salapi ba yang tagal...hmm.
Sinambut ya ing Among Ed qng pangagovernor na ning Pampanga uling aliua ya talaga ing datang na careng tauo. E mu ing pangapari na ing migdala caya qng tagumpe, aliua mu ing catapatan na qng nasa nang sumuyu qng balen, nune uling pepaquit na talaga careng cabalen ing tune nang pangacapampangan a malugud qng Capampangan. Reting bagueng a reti, e cu la acaquit cang Ares Yabut. E cu acaquit ing pangacapampangan nang Ares Yabut. Pilidu na la mung reng mitagang Capampangan cang Ares a e na magsilbi ban mayaus ca pang Capampangan.
Balu cung sinaua na cayung talaga uling y ti ing pane cu daramdaman quecayu, dapot, e no co uari talagang bisa? Male ta mu nung e no pin bisa reng tauo careng Lazatin ampong Nepomucenu. Nanu ya ing ipaquibat yu patie isulat yu ne qng papil ing iyalal yung congressman ning mumunang district ning Pampanga? Abalu ta na mu ing paquibat careting cutang cayari na ning alalan.
Yng Sala