Calub mu carening pipanganan a reni, sasayoso la reng lango. Ai! Opu, atno pung caracal reng lango. Lulub ca pa mu caren sasagana no reng lango a macasumami. Inyang bayu-bayu la pa mu reng pipanganan a reni, paquisabian da ca qng Amanung Inglis. Ing pecabantug pa canita, y tang maqui maragul a "M", y ta ing letra a magumpisa qng laguiu na. Uling menibat ya qng America, mayap mu y tang paquiapusan da y tang carin queni, ban canita mo balamu minta na ca mu naman qng America at mengan carin. Quing queluatan, ating mequiapus caniti, y tang ating maragul a lango. Ai! Tatabuan ya pala y ta a culul papas. Uling pequiapusan nea mu y tang mumuna, Inglisan mu naman ban canita mo maglupa ya mu namang ibat America. Bandang tauli, managalug na la mu rugu. E cu na atatandan nung capilan pa migumpisa y ni.
Inyang sinabi cung malango careng pipanganan a reta, talaga pung malango carin, retang sulasulapo at durugpa qng canan mu. Anti na ca mu namang mengan caretang pipanganan queng lele dalan. At atin pa pung aliuang lango carin, 'oreni asno pung pangaragul. Ing paquiramdam da quing sarili da patie mamangan la carin, mangasalapi la mo. Damdaman mu la, mipanagalug la mu naman. Nga ra careng anac da, "Oh, eat na", "Oh, dirty iyan". Ai, ua! Canong yong daramdaman. Anti cayu mu namang lango a macasorang acaquit. Atin pa pung aliua caren, atin la pang pacataquiqing ipus a menibat pa Bisaya a babayaran mung tia-tiduang libu ing bulan. Ai ba! Reng aliua, adua-adau la pa pala reng ipus da, mapalyaring mecamura la inya adua nong tambing ding quinua da. E na cu man malulunus careng Bisayang a reni a menibat pa mu careng mangarayung lugal ban munta qng Capampangan at maqui-ipus at bayaranan da mung tiatiduang libu uling asno no pung catula canini, agagaua ra pang paralang salapi que carela. Ren namang aliua carela, atiu la quing Fields Avenue at pagmaragul da ing pangapilipinu da.
Sagli mu, mipacaba ne ing pisasabian. Balu yu no pala retang amanuan cung mangalangong pipanganan? Reta reng McDonald's ampong Jollibee. Tutu man, balamu lango yang damulag y Jollibee ne!? Ua, pipanganan lang pacacalulu reng McDonald's ampong Jollibee. O se map pin ating McDonald's ampong Jollibee uling ambusqui macananu, atin no mang apupuntalan reng pacacalulu at macapangan no man rugu careng pipanganan a maqui aircon.
Atin nang mecasabi quecayung tinagun ya canu quing metung a casalan at ing tau da canu, Jollibee!? Catula cu canite! Balamu pala tinagun ca caretang magmasusi qng aldo rang quebaitan reng anac a mangalati. Dapot alang maroc nung pepacanan mu lang hamburgers ibat quing Jollibee reng pesitagun quing casalan uling binang masaquit talaga ing bie.
Magcanu ya uari ing pecamurang hamburger qng McDonald's ampong Jollibee? Quing Jollibee, lima yang pulu at pitung pesus y tang ating hamburger, french fries, ampong coke; 'a ua, aguiu da ne reng pacacalulu. Cabang pacamal neng pacamal naman ing pisasali da, lalati nong lalati naman reng hamburgers da, at e na la mu naman manganyaman reng canan da carin. Balu da na mu namang maquiyagus qng casaquitan quesa naman qng maniara la. Dapot, e marayu ing dacal na la mu naman reng mamaniarang McDonald's ampong Jollibee uling paritac na lang paritac reng lulub careti nung apansinan yu. Baquit nga mo!? Uling cacamal, e na manyaman, ampong sasaquit nang sasaquit ing bie. Nung apansinan yu, atin pang Cindy's ngene? Atin pang Wendy's? Atin pang Tropical Hut? Daracal la pa reng Burger King a tatalacad da? Nung atin pa careti, mangalagad na la mung tutu. Nung atin la pang tatalacad, careta namung mangaragul a shopping malls. McDonald's na la mu ampong Jollibee reng talagang mitatagan, ditac na mu namang panaun, ala na la mu naman reti.
Nu carin la pa caya mangan reng pacacalulo patie ala na lu reng McDonald's ampong Jollibee ne!? Lalu na, nu carin no caya mangan retang mangaragul a lango a caya-cayabe do reng anac da ampong ipos? Aru! Ala na lang pilagayan qng caparatutan da canian nung cai.
Yng Sala