Pasaquit nang pasaquit ing bie qng Filipinas lalu na ñgeni uling pacamal neng pacamal ing laru. Patie migtas ing alaga ning laru, camal ñgan alus reng pañialuan uling daragul ing gugugulan da reng maquina a gagamit laru o corrienti qng pamañgauang gamit o canan. At daragul mu naman ing gugugulan da reng saquen a magdala careng pañialuan da reng tauo.
Patie naman migbaba ing alaga ning laru, atna namang casaquit magbaba reng alaga da reng pañialuan uling mesali nong mal reng pisasali da reng tauo at e da na cabud ababa pa. At lalu na, e da na mu naman buring ibaba ing alaga da reng pisasali da reng mamisali uling mabauas ing tubu da.
Iñya pa mung February 2, 2011, caibat na mu rin ning macabang panaun a tiapitung pesus ing pamasayi careng jeep, icua na na mu ring meguing tiaualung pesus ing pamasayi. Y ta mu ring aldo a y ta, ala lang camale-male reng mañieque careng jeep a migtas na pala ing pamasayi. Mañgabigla la reng tauo patie sisiñgil yang tiaualung pesus ing driver. Cabud da na mu tinas ing pamasayi careng jeep a ala mang agad a capabaluan careng memalen. At canita mu rin, dacal mu naman careng pañialuan ing micamal.
Casumañgid da reng pañgacamal da reng pañialuan, e no man migtas reng upa da reng magobra iñya lalu lang mañgasaquitan qng bie da. Isipan mu na mu, ing dinalan mu mabauas ne alaga uling ing sadia mung asasali qng dinalan, e mu ne asaling dinalan uling migtas ne alaga. Nung atin cang tipun a libu, mebauas nea mu naman alaga ing libu mu.
Nanu pa ta! Sundu pa mu rin ing bie qng casaquitan. Nung maquipagobra ca mu careng cumpañia, e mu na agaua ing cabud mu nea mu lacuan ing obra mu uling caibat mung meco, agad lang maguisan reng ditac mung atipun. E mu y ta, atna mu naman casaquit maintun cayalili ning obra mung licuan. Iñya nung babalac cang maco qng obra mu, e mu na babalaus at mibabata na ca pa mu qng obra mu. Maco ca mu nung bitasa cang atin cang alipatan a alilua uling nung ala, mate ca qng danup. At saca nung atin pang mamasa queca at pacanan mu, macalunus la mu namang calupa mu patie licuan me ing obra mu.
Casaquit da naman daralanan reng peñgaring ating pagaral lalu na qng college uling mañgalulu na la queng pamasayi na pa mu ning anac, idagdag me pa caya ing pamayad dang matricula.
Quing palague cu, ala ne talagang pagasa ing Filipinas agguiang alilan yang parliamentary ing government nung e ya mu ring maguing federalism.
Yng Sala