Misan a aldo, iquit que ing macasinup cung Seiko 5 a e na lalacad uling qng maluat nang panaun a pañgasinup at aisipan cung pisali cu nea mu quesa queng macasinup ya mu at alang paquinabang. Yñya mine cu qng Añgeles City at carin sibucang pisali caretang mañialing sirang relos a pacalele careng dalan na ning cabalenan, o retang ausan tamung mag quintu, pilac, tansu. Pañgutang cu carela nung buri deng saluan y ning Seiko 5 cu at maralas dang paquibat canacu ing e da la sasaluan reng relos a anti careti. Sabi na pa nitang metung careng minunang acutnañgan cu, pamiesa da ne mu canu ing relos cung Seiko 5. Dapot e cu pa mu rin tinucnang mañgutang careng aliua pang mañialing sirang relos a reni.
Qng cacacutang cu carela, apansinan cung deng mapilan carela, e la Capampañgan at qng palague cu, nung e la Visaya, Muslim la. O'bat mo meñgapacanian qng Pampanga a miparacal la reng alang apapañgan qng pibatan da at queni la sisicsic ding diablus! At y ta na pin, e ya Capampañgan ing pacatauling acutnañgan cu.
Quitnan que nung buri neng saluan ing Seiko 5 cu. E ya tinañgu nune quinua ne ing relos cu at sabi nang lauen ne pa canu at binusni ne. Cabang bubutingtiñgan ne ing relos, atin na cu mang daramdaman a aduang tauo a mipagsalita qng cagulutan cu diquil qng carelang dirt bikes a macatucnang qng lele ning dalan cayarapan da. Misasabi la qng amanung Capampañgan dening adau at apansinan cu a lupa yang Indian ing metung carela at lupa ne mang catutubu ing casabi na. Cabang mipagsalita la, pipilit yang magtagalug y ning catutubu cabang pipilit ne mang magCapampañgan y ning Indian a neng misan balamu mababalid ya oneng pamilitan na pa mu ring mañgapampañgan at ararapat nang masalese y ti. Nung e mu pin qng lupa na, e cu man aisipan a Indian ya uling biasa ya talagang mañgapampañgan. Bala mu mamialuñgan la reng adua, neng misan apapatuqui neng magtagalug y ning buguc a catutubu ing Indian, at anti mu rin, apapatuqui ne mu namang magCapampañgan ning Indian y ning catutubu. Sabian ta nang Capampañgan yang talaga ing catutubu, ing pagmulalan tamu ñgeni, baquit caya pipilit yang magtagalug ing animal a catutubu. Dayu ya mu ping Indian ing casabi at apapansinan na namang biasa ya talagang sumabing Capampañgan oneng pilit ne pa mu ring tatagalugan ning pacarat.
Sindu ne pa mu ring piglaue ning maglaring relos ing mechanism na ning Seiko 5 cu at sabi na a e ne maliari canu, at saca canu mitmu neng calauang. Papaquit na pa y tang calaung canacu oneng atnong pañgalati at e cu man abibitasa nung calauang pin y ta o ali bagcus lupang culapu. Isipan cung buri neng paglauen ban canita aquit no ring sira at saca na mo sabian canacu a palarin cu nea mu quesa qng pisali que caya. Yñya meualan na cung pagasa a saluan ne pa y ta iñya sinabi cu na mu cayang, "Quecayu nea mu pu!", oneng e na cu aintindian iñya sulung ya pa mu rin qng cacabutingting na qng Seiko 5 cu. Caibat neng bitingtiñgan, tecap na ne at pecasusi ne at sabi nang saluan na nea mu canung limang pulung pesus canacu ban canta canu atin yang alague qng cayang salamin nung nu carin no palague deng relos a palarin da caya. Yñya mebigla cu qng cayang sinabi uling bibie cu nea mu pin caya dapot buri ne pa palang saluang limang pulung pesus. Yng mong depat cu, migcanuari cu mong mimisip at bala mu mo melungcut cu, at caibat na ning pilan mung penandit, mebisa na cung agad at pepasalamat cu pang maragul caya. Bibie cu nea mu pin caya anti mong saup qng obra na dapot seli ne pang limang pulung pesus canacu. Mayap talaga neng sasabi ca qng Amanung Sisian uling dugpa queca ing mayap a calma.
Meari ne mu rin ing sasalita cu pariquil qng canacung Seiko 5 oneng atin cu pang iyugne caretang siniñgit cung aduang mipagsalita nandin qng cagulutan cu cabang pisasali que y tang relos cu.
Mumuna, apansinan cu; patie mo ing Capampañgan atin yang casabing tauo at abalu nang biasang ya palang sumabi qng Capampañgan ing casabi na, o't e ne mo agad paquisabian qng matatas a Capampañgan oneng magbalid-balid ya pa mu mong mañgamanu qng Capampañgan a bala mu mo e na agguiung paqui-intindian ning casabi na nung mañgamanu yang matulid caya. Malilyari mu rin y ni patie mo ing casabi da bayu-bayu ya pa mung mabibiasang mañgapampañgan.
Anti mu rin, atin cung quilalang mapilan a migdatun na qng Pampanga at mebiasang sumabi qng Amanung Sisuan oneng apansinan mung balid la pa mu rin, at ala na mang maroc canita. Yng masaquit mu, reng mamurit-murit a Capampañgan, sabian dang agad quening tauo a atne canung canong ing Capampañgan na at malaus da ne pin mang panagalugan rugu. Bugoc a Capampañgan, macananu lang maguing matatas qng Amanung Sisuan dening dayu nung sabian yung atnong canong mañgapampañgan at lacuas yo pang panagalugan! Ninung manong canian!?
At uyni pa ing camuritan da reng Capampañgan. Capampañgan cami ñgang misasabi qng obra angga qng abalu ming Ilonggu ya pala ing metung quecami. Ala cami mang camale-male uling atneng cabiasnan mañgapampañgan angga qng asabi na mung qng Iloilo ing pibatan na dapot e na sinabi nung carin ya mibait o meragul. At uyni na ing camuritan da reng cayabe cung Capampañgan qng obra, iñyang abalu dang Ilonggu ya, penagalugan da neng penagalugan ding masira-sira buntuc.
Yng Sala