Y ti ing banuang Aduang Libu't Apulu (2010) a panaun na ning maracal a pamaniuling qng labuad na ning Capampangan. Apulung banua caibat na ning banuang Aduang Libu (2000).
Caibat na ning miguit a dinalan a banua, misane ta mung susulat ya ing banua a magumpisa qng 19 anti na mo ning 1972, 1986, 1999, at aliua pa. Inyang panaun a bayu mag 2000, dacal la reng capigaganacan anti na mo ning Y2K careng computers a linagap qng mabilug a yatu a malyari canung macasira careng nanu mang macasinup careng computers. Dacal la reng melisuas caniti lacuas na reng pisimpanang salapi dapot ala na man palang catutuan. Dacal la mu naman reng mimisip nung nanung mayap a balita ing daratang qng banuang Aduang Libu dapot alang na mang maragul a pamagbayu catuclu na niti.
Calabas na ning apulung banua, balamu carin ta pa mu iquit ing maracal a pamagbayu lacuas na qng amanuan ta mung technology. Inyang panaun a 2000 at bayu pa canita, bayu-bayu la pa mu reng cellular phones canita at atno pang cacamal rugu. Mangaragul la pa reng cellphones canita at e mo cabud abulsa na mu, at malagad la pa mu reng ating Short Messaging Service (SMS) o mayayaus mu namang text message. Reng paca-cellphone canita, e do buring bubulsa reng cellphone da at pane da la mung tatalnan ban mong mayaquit lang ating aguiu qng bie. Ai rugo, pagmayangin da la reng cellphones canita uling balamu mo nung ninu y ca patie atin cang cellphone, matas la mo laue queca. Metung ya mu ing tigtig da reng cellphones canita patie ating mamaus queca, ya pin ing "quiriring-quiriring".
Oneng ngeni, atno nong camura reng cellphones at e do no pagmayangin man. At paca-cellphone na la mu naman reng balang metung pelalung reng anac, alang obra, magtindang baguc, at aguiang careng manucnangan careng mangasulud a barriu. Miayaliua na la mu naman reng titigtig careng cellphones ngeni patie ating mamaus queca. Nung buri meng daramdaman titigtig ing dalit da reng ArtiSta.Rita, ipalub mea mu queng cellphone mu at y ya nang tigtig atin mang mamaus queca o mig-text. Malyari na ca munang manalbe TV o penicula careng cellphones, o paquiramdaman la reng MP3 mu. Ai ba, malyari ca mu naman palang magpakodak o cumuang pialben careti. Ai sagli mu, malyari ca mu naman palang mamyalung careng cellphones ampo pang mag-internet. Menaquit cu mu namang ating sulu ban agamit mu patie mitda ya ing corrienti. Nanu pa caya ing idagdag da careng cellphones ne?
Bina la mu namang mangalagad reng internet cafe canitang bayu o caibat migbanuang Aduang Libu uling dial-up o narrowband ya pa mung ing connection canita at atnong cabagal rugu. Malagad la pa reng gagamit e-mail ampong chat mu naman uling e pa bantug ing internet connection.
Ngeni, menyampucaqui no reng internet cafe nu carin ca man marap at paca broadband connection na la ngan. Mapa-anac o matua, aquit mu la careng internet cafe, mag e-mail, chat, o mamyalung. Dacal na la mu naman careng pibale-bale reng atin nang internet connection.
Mangalagad la pa mu ampong mangalati reng shopping malls canita anggang mibusni ya ing SM City Pampanga inyang Noviembri ning banuang Aduang Libu at canita no memaniatang reng aliua pang mangaragul a shopping malls. Mipalalu no caracal reng shopping malls qng Labuad Capampangan at e mi na la paniglauan ngeni. Ing Marque Mall ing pacabayung maragul a shopping mall a mibusni quetang tauling banua.
Mibuclat nea mu naman ing masanting a Subic-Clark-Tarlac Expressway (SCTEX) uling balamu ati yu ca mu naman Europe patie dinalan ca queni. Binang malagua ing pamaglacbe manibat Tarlac, Angeles ampong Mabalacat papunta qng Bataan ampong Olongapu.
Madacal na la mu naman reng eroplanung durugpa qng Diosdado Macapagal International Airport (DMIA) at dacal na la mu naman reng sasaque carin lacuas na careng magobra ampong bisang mamasyal qng Singapore, Malaysia, Macau, Hong Kong ampong Korea. Ngeni pin, lalaparan de ing terminal qng DMIA. Ing DMIA na talaga ing talacad bilang peca-airport na ning Filipinas.
Linualas da ne mu naman ing McArthur Hi-Way ampong balamu isundu da neng talaga ing tren uling pemaglaco da na la reng menucluan carin.
Inyang banuang Aduang Libu, mabilis nea mu namang mamamate ing Amanung Sisuan at lacuas ya pang mebilis mamamate ing Amanu Sisuan ngeni pauli da mu naman reng maracal a mengapalyari inyang milabas a apulung banua. Dapot, pauli da reng tune Capampangan a magmasabal qng Amanung Sisuan ampong Culturang Capampangan, masasaguip ya ing Capampangan aguiang paritac-ditac oneng e mi ngan aguiu y ni nung y cami mu. Cailangan mi ngan ing saup da reng sablang Capampangan a ating masabal qng pangacampampangan da. Miabe-abe tamu at saguipan taya ing Capampangan uling pasaquit neng pasaquit ing cabilian na ning Capampangan lacuas na ngeni uling bibilis ing pamaniuling qng Labuad Capampangan at daracal nong daracal reng darayu quecatamu. Reng dayung a reni reng salang tamu ngan at mabilis reng papaten ing Capampangan.
Yng Sala