Misan a aldo, mipadalan cu qng metung a tete at atin cung abatiauan a dacal a tauo qng sapa. Yng sapang y ni, atin yang ditac a danum a mamagus at dacal la reng layac a pacayugse qng palele-lele na. Aburian cung alben cu la at lauen cu nung nanung gagauan da carin.
Atin metung careti a ating tatalnan a panasan na. Ing panasan a y ni, lupa yang alaua oneng ing queng sepu na niti, screen yang malapad a macapabilug. Y ning tauong y ni, cabud nea mu sasaluc ing cayang panasan qng danum at cabud atin yang asan a asasaluc at saca ne ibalicuas patas ing cayang mala-alauang panasan at sulpit ya qng babo ing asan a asaluc na, at atin namang sapu careng cayabe na quetang asan a sinulpit babo.
Mimisip cu nung baquit cabud na na la mu asasaluc re ning asan a alang casaquit-saquit. Tambing no cayang mete re tang asan a re ta at cabud na na la mu sasalacan ibat qng danom!? Inya, menalbe na cung menalbe qng pamanasan da.
Cabang alben cu la, atin mu namang aduang tauo quing tete a manalbe mu naman carela at atin lang timba qng lele da. E do caquilala re ning aduang tauong a re ni de tang manasan qng sapa. Inyang mipalapit ya ing metung carening manasan, meñgutang la re ning aduang tauo queng tete. Quitang da nung nanu ya y tang gagamitan dang panasan. Yng pequibat na, mañgorrienti la canu at ing pañgorrienti da, macasalpac ya qng 110V a salapacan corrienti qng metung a bale.
Ñgeni, balu cu na nung baquit cabud na na la mu sasalacan re ning asan nitang tatalan quetang mala-alauang panasan. Tacnidu na! Macataid ya pala queng 110V a corrienti. Inya pala cabud na la mu sascad reng asan a matudtud qng pasuluc-suluc, agad salacan, at iyatia qng babo. Ynya naman lalu cung meuili qng pamalbe cu.
Cabang alben cu la, atin namang mipadalan a aduang tauo a macasaqueng motorcycle, lalaqui ya ing magmaneu at ating macayangcas a babai qng gulut na. E cu balung sabian nung asaua ne y ning macayangcas a babai o anac ne uling maqui quelañgan ing tua da. Tinucnang la re ning aduang macasaque qng motorcycle malapit canacu at quitnan da cu nung nanung gagauan da re tang tauo qng sapa. Sinabi cu carela a mañgorrienti lang asan at macasalpac ya y tang mala-alauang pañgorrienti da qng 110V a corrienti. Mebigla ya y ning lalaqui, "Tacnaidu ra, pota galang y la reng mecorriente!". Linaue da la sinagli at meco na la.
Pañgabaguia naman, atin namang babai a dintang and linaue mu naman caretang tauo qng sapa, calupa da re tang maca-motorcyle, quitnan na cu mu naman. Calupa na nitang sinabi cu caretang maca-motorcyle, sinabi cung mañgorrienti lang asan at macasalpac ya ing pañgorrienti da qng 110V a salpacan qng bale. Misdan ya naman rugu calupa da re tang minunang meñgutang canacu.
At pañgabaguia naman, atin namang dintang a lalaqui. Calupa da re tang minunang meñgutang canacu, magtaca ya nung nanung gagauan da re tang tauo qng sapang mabuluc. Sabi cu, mañgorrienti lang asan at macataid ya ing pañgorrienti da qng 110V a salpacan qng bale. Misdan ya mu naman queng abalu na dapot macayaliua ya ing ablas na canacu inya aburian cung isulat que queni ing iquit mi quetang sapang mabuluc. Ñga na, talagang magcasaquit no qng bie reng tauo at pati rugu ing pamanasan qng sapang mabuluc, daraptan da na. Pati canu re tang asan a mañgalati, midadame la. Ai ua pin, ñga co, lauen mo man reng asan, cabud na la mu susungcad cabili na nitang panasan da qng danum. Ñga na pang digdag, e la Capampañgan den uling e da dapat reng Capampañgan ing anti yan. Matula cu qng paquibat na, at lalu que pang neyunan qng sinabi na a e da pin dapat reng Capampañgan yan, at reng tauong a ren dayu la mu queti Capampañgan.
At y ta, alben cu la pa mu rin uling macauili la ping alben qng pamanasan da at cabang sasadsad de ing cauad na ning pañgorrienti da papunta qng tete, dimdam cu lang misasabi. Ai rugo, Capampañgan la pala...o mebiasa na la mung mañgapampañgan. Nung Capampañgan la man, sana gagauan da na mung libañgan ing daraptan da. Nung ali naman, ot mipacananu na la reng Cabalen tamu qng sarili dang balen. Masaquit talagang pañgilagan ing casaquitan na ning bie, ale!?
Oneng sagli mu. Atin uaring maroc nung manasan ca qng sapang mabuluc ban atin cang apañgan!? E uari, y ta naman ing dapat. Quing malaguang salita, ala na mang maroc nung dacpan ta la reng asan quing sapa ban atin ta mung apañgan uling malinis no man reng asan at talagang cacanan la. Ninu uari ing e mamañgan asan!?
Yng mung e masanting a iquit cu carin, y tang paralan a daraptan da qng pamanasan a gagamit 110V a currienti, anta nu mong mecorrienti ca carin, peintun me pa ing camatayan mu quesa queng apañgan mu. Ampo pa rugu re tang mañgalating asan, midadame mu naman qng paralan a pamañgorrienti. At lalu na, ot gueua reng piugsayan layac ing sapa, catmu yang layac ing misumangid na niti.
Yng Sala