Deng casulatan qñg Imperia Ning Capampañgan a y ni, macasulat la qñg Roman Letters qñg paralan nung macananu la susulat ding Castila a mayayaus na ñgeni careng Capampañgan a Sulat Baculud, Tutûng Capampáñgan, o CQ.
Yñyang pigmulan queng lelañgan ing Imperia Ning Capampañgan a y ni, e que pa gamat ing pamanggamit qñg Sulat Baculud iñya nung abasa yu na la reng meñgapaunang casulatan queni, ating mapilan careng amanu a e macatud qñg pañgaletra da. Mangga man ñgeni, e cu pa asabing gamat cu ne ing Sulat Baculud dapot palac neng masalese ing pamanggamit cu caniti ñgeni quesa iñyang sadia. Yñya e cu pa mu rin tutucnang qñg pamagaral qñg pamanggamit qñg Sulat Baculud angga qñg panaun a ala na cung capicunuang asabing gamat cu ne y ti. Asajan tamung lalu la pang salese pañgaletra reng balang amanu careng anggang aliua pang tutuquing casulatan queni.
Anti mu rin, nung atin lang ausang Proper English, atin mu ring Proper Capampañgan o Manayun A Capampañgan nung nu carin ating tutuquian a grammar o pamitaladtaran queng pamañgamanu o pamañyulat man qñg sabing Capampañgan. Matalustus cu qñg pamañgamanu qñg sabing Capampañgan dapot atin mu ring pamicatagun a sasala cu qñg grammar o pamitaladtaran, at sasalamin mu rin y ti careng meñgapalabas nang meñgasulat careng casulatan queni. At anti mu rin, e cu mu naman tutucnang queng pamagaral queng sabing Capampañgan ban canita lalu cu pang talustus qñg pamañgamanu ampong pamañyulat caniti.
Anggang binit lang mesulat masalese reng anggang casulatan queni oneng anti na na ning asabi cu babo, mapallaring ating mapilan careng amanu a e macatud pañgaletra ampong ating e macatud pañgataladtad.
Paquisabi cu mu ring mayap quecayu ñgang talapamasa a e cayu tutucnang queng pamagaral queng sabing Capampañgan uling maracal ta pang dapat abalu.
Yng Sala