"Queni Mañgan" a'na nitang macasulat careng mañgaragul a letra qng maragul a pasquin a malapit qng Astro Park qng Añgeles City. Bandi ne ning SM City Clark ing pasquin a y ta nung nu carin da la patalastas ding miayaliuang pagsayan, pagmasusian, tigtigan, teracan, sale, at nanu pa. Ñgening bulan ning Octubri, pagsayan de ing Fiestang Culiat. Nung acucutang yu qng isip yu nung nanu ya buring sabian ing Culiat at pauli na mu rin ning dacal la ring e maqui balu caniti, paburen yung paquibatan cu ne queni ing gagatalan na ning isip yu. Yng Culiat, laguiu yang tanaman at reng pipumpunan tamung Capampañgan iñyang minunang panaun, palaguiu do caring tanaman deng carinan. Yng buri nang sabian, Culiat ya ing mumuna nang laguiu ning Añgeles City uling dacal la reng tanaman a Culiat canita carin. Anti ning baranggay Balibago ning Añgeles City mu naman. Laguiu ya mu namang tanaman ing Balibago a gagauan dang lubid.
"Queni Mañgan", uling bina deng quilala ing Capampañgan a mañyaman maglutu at y ti mu rin ing pagsayan da qng SM City Clark bilang pamagmasusi qng Fiestang Culiat. Uli na ning qng cabiasnan dang maglutu reng Capampañgan, dacal na la reng pipañganan Capampañgan at mañgauang capañgan deng linto. O se map na mu at balu deng gamitan ing caguiuan dang mañyaman maglutu reng Capampañgan iñya agaua deng masanting a cabiayan ing pagmaglutu at ing catutuan na pa niti, dacal la reng misalapi. Alimbaua careng pipañganan a Capampañgan a linto at misalapi, ing Cabalen, ing Susie's Cuisine, ing Razon, ing Mañgan, ampo pa retang e cu na atatandanan. Anti mu ring careng mañgauang canan Capampañgan a Pampanga's Best, Tita's Special, Mekeni, Mother's Earth, Sasmuan Delicacies, ampong pa retang mumusbung pa. Deti, guinamit da ing pañgacapampañgan da ban canita dacal la reng luñgub qng carelang pipañganan o ban canita masali la reng carelang pamisaling canan. Dacal la reng Capampañgan ing gagamitan de ing pañgacapampañgan da ban sumanting at sumulung masalese ing cabiayan da.
Ñgeni, uyni na ing macalunus a cabilian da reng meñgasambitlang pipapañganan ampong mañgauang canan at ing pañganib a daratang qng mabilug a Capampañgan. Nung e yu pa balu, reng anac da o reng apu da reng maquibandi careng negosiung a ren, tagalug na lang daragul. At macananu lang meguing tagalug reng anac o apu da!? Anti na mu rin ing daraptan da reng maluse-luseng Capampañgan a panalugan do reng anac da. Macananu caya patie dintang ne y tang aldo a reng anac o apu dang tagalug na reng tatalan careng negosiu da ne!!!? Macananu de cayang pagmaragul ing pipañganan a Cabalen a mañyaman ing yapag da carin uling pipañganan yang Capampañgan dapot ren na palang anac o apu dang tagalug reng maqui bandi na! Canong na, ne po. "Pipañganan Cabalen, mañyaman ing ulam", caibat pala tagalug na la reng tatalan. Mapalyaring ing specialty da na canita qng Cabalen, y tang pecaburi dang cacanan deng tagalug, y ya pin y tang ausan dang "dinuguan" a lupang taclang buraris a meñgasamuac qng silliao a ating larang macaba a gato-gato, atna pang cabuluc a bauo.
Anti mu rin canini ing malyari careng aliua patie dintang na ing aldong y ta. Ñgeni pa mu pin, ing sasabian na ning Susie's Cuisine, "The best in Pampango kakanin". A!, "kakanin"!? Nanung "kakanin"? E pa man matatagalug ne rugu. Nung sana macasulat yang "The best in Capampañgan food" na mu o caya "The best in capañgan Capampañgan" ba yang lalung manayun. O patie reng anac o apu dang tagalug na reng tatalan qng Susie's Cuisine, ing sabian da na mu canita, "The best in Tangalog kakanin" uling tagalug na la mu rin ding maqui bandi canita.
Yng Sala