Nucarin na ca mumunta ngeni patie bisa cang manalbeng penicula? Mumunta ca pa uari caretang minunang cine qng San Fernandu, Angeles, ampong Guagua? Ali na, taglus na cang tambing qng SM o Robinson. Neng misan careng aliuang malls calupa na mo ning Jenra Mall qng Angeles.
Inyang mengalabasang apulung banua a ala lu pa reng mangaragul a malls queng Pampanga, atin pang mapilan a lulub careng minunang cine calupa da mo reng Family qng Angeles, Edros qng San Fernandu, o qng Royal ning Guagua. Dacal la pa ren oneng mengacalingnguan na la pauli da ring mangaragul a malls.
Canita, bayu ca lungub queng cine ban manalbe, mangarter ca pa mu caretang pacapasquil a larauan da ring peniculang macapalague carin o retang ipalague da qng tutuquing duminggu. Neng misan naman, nung malapit ya mu ing pipagaralan mu careng cine, dumalan ca pa caren patie mumuli ban mangarter. Neng misan naman, patie oras ning recess ing pamangarter anggang e mu na balung oras na pa lang magbalic qng pipagaralan mu.
Atin mu namang cine canita a pulus bomba reng palague ra. Ay rugo! Samal la canita reng mangarter. Reng aliua naman, cunuari mo mipapadalan la mu carin oneng ulata na mang capad dang mangarter carin.
Mangatindi la pa reng cine canita uling atin lang "double". Aduang peniculang mituqui ing alben mu, caibat, ing bayad pa canita, adua mung pulung pesus. Seselan na cu mu nga tamu pen!
Ating pang balcony ampong orchestra careng cine canita. Magdala ca pang canan qng quilub, nung ali banana que, singcamas a ating baguc, at maralas ating magdalang butul pacwan.
Reng namang patalastas da reng cine, gugulis da la mu qng cacha. At no ping pangagaling reng gugulis caren. Mangasanting la ring lettering agguiang misan dea mu padalan ing paint brush. Pati reng larauan da reng gaganap, gugulis da mu. Atin pa neng misan, ating dzip a dudurut careng barriu ban ipamalita reng macapalague careng cine da. Neng misan naman, ating matas a pasquil nung nucarin i-istapler da lang reng peniculang macapalague a macasulat mu qng Manila paper a culul papas.
Mibalic ta na qng casulungsungan a panaun. Atiu na ca SM, macapangarter ca pa? Ua, malyari pa mu rin dapot e na na calupa inyang canita. Pulus nong posters a mangaragul reng aquit mu. Ala nang larauan a palati-lati. Aliua na mu rin ing panaun ngeni, atin talagang bagueng maragul ing pamiyaliua pauli na ning panyulung. Quen na mung TV ing patalastas da reng penicula, quing periodicu, ampo pa quing Internet. Tia magcanu na ing cine qng SM ngeni? Miayaliua, maralas tia dinalan. Nung bisa ca caretang amanuan dang 3D, tia tiduang dalan ampong limang pulung pesus, inya nung apat cayung manalbe, malibu cang tambing ning digpa ning alti!
Yng Sala