Nanu na naman ing ayisipan nang Mayor Marino "Boking" P. Morales ning balen ning Mabalacat Pampanga at buri deng alilan ing laguiu ning balen at gauan deng Mabalacat Clark canu patie mipasar ya qng pañga cityhood na niti. Caibat na ning labing anam a banua a pamanungculan nang Boking, mangga man ñgeni ala ya pa mu rin ararapat a mayap qng balen ning Mabalacat. Manibat pa qng ibat, ing namung pañga cityhood na ning Mabalacat ing erapan na. Pilan na ne mong banuang lalacaran ing pañga cityhood na ning Mabalacat? Alus casing caba na nea mu naman ning cayang pamanungculan qng Mabalacat.
Sangcan da mo ing lalu yang mibantug ing balen ning Mabalacat at lalu lang dacal reng magnegosiu carin nung dagdagan deng Clark ing laguiu ning Mabalacat uli casi canung dacal la reng maqui balu qng Clark. E pablasang balu de reng Amercanu ampong reng aliuang daiwan ing Clark Pampanga, mayaua ya mu naman ing Mabalacat qng cabantugan na ning Clark Pampanga. Ua at dacal la reng maqui balu qng Clark Pampanga oneng ninung maqui balu qng Mabalacat Clark? Madacal ne guigulan a panaun ing laguiung Mabalacat at apaintun me queng mapa dapot atin ca uaring apaintun a Mabalacat Clark careng mapa. Caren na mung bayung mapa me apaintun ing Mabalacat Clark nung mipaltutu man ing babalacan dang y ti.
Nung buri meng mibantug ing Mabalacat, dapat yang panigobran y ti qng paralan a sumanting ya ing cabiayan da reng memelan ning Mabalacat, sumanting la reng dalan, salese ing services qng danum ampong corrienti, at miayayaliua pang bague a macapariquil qng icasalese da reng bie da reng tauo.
Patie meguin yang city ing Mabalacat, dagul ing babayaran dang buis anti na mo ning real estate tax at pelalung reng residence certificate tax o cedula. Nung mamasyal ca Mabalacat ñgeni, e mu man panamdaman a atiu ca man qng city. Dacal pa ing dapat dang panigobran qng balen ning Mabalacat ban yang maguing carapat-dapat a maguing city angguia mu sang apantayan ne ing Angeles City ampo ning City of San Fernandu. Nanung aquit mu ñgeni qng Mabalacat nune pulus casaquitan qng bie, sulasulapong plastic, mayalicabuc a dalan, dacal a menucluanan, at sinapac yang dayu ibat careng miayaliuang provincia a alang obra. O ren ping utang dang buis qng provincial government ning Pampanga e do abayad-bayaran, yuyuna da pa ing pañga cityhood na ning Mabalacat. Balamu naman uari sumanting ing bie nung maguin yang city ing Mabalacat. Ing city, ala ne mang asaup qng cabiayan da reng memalen uling palamuti ya mu y ti.
Nung mipasar ya man at maguing city ya pin ing Mabalacat, macaguiu ne ing laguiung Mabalacat City at galañgan ya ing laguiung maracal nang panaun a lebasan. At nung e ya man mipasar, map neng ausan da nea mung Mabalacat Cityhood ing balen ning Mabalacat, ambusqui macananu, atin ya pa mu ring city ing laguiu na, uyta mu pin Cityhood ya.
Yng Sala